人人以為盧宛茵（Madam Lo）是專恰女婿的勢利外母、或屋邨師奶。撲口罩、搶廁紙，就如騎著電單車的黑皮褸，橫衝直撞。其實她是職業婦女，三十多年來馬不停蹄，不然怎會在電視熒幕老是常出現？武漢肺炎疫情嚴重，她跟所有在職媽媽一樣，返工之餘還要撲口罩，「我唔識上網嘛，唔識買。」「仲要撲廁紙呢？我問過啲超市、藥房，佢話你六點嚟排隊啦。我諗，我排到都冇啦，唔夠啲大媽搶。」
公仔箱中的盧宛茵是個大媽。現實中她甚少下廚，唔打牌，買餸只會去超市，「做戲還做戲，真實生活係自己。」「我完全係弱者。」猶幸飾演過她兒子的，都很孝順。得知她缺口罩，鄭敬基、古天樂等乖仔，即時開心速遞，「佢哋好好心。患難見真情。」
---
二月中，盧宛茵回去電視城為新劇試造型。當時疫情山雨欲來，街上人人已戴上口罩，她才發現全城缺貨。翻箱倒櫳，終於找到一個熊本熊圖案的布口罩，「係我個女好多年前去旅行，見到得意買俾我嘅。咪喺入面塞啲廁紙、再包保鮮紙。呢啲都係我自己諗㗎咋。」「抖唔到氣咁滯。我兩個仔都有話，你唔好咁，焗到你暈。」「佢哋嗰陣都買唔到（口罩）。後來新抱買咗個黑色、洗得嘅俾我。」
演員和幕後都無法home office。TVB在疫症爆發初期居然沒有為員工提供口罩，「不過化粧師、髮型師平時都會戴口罩的，因為工作時大家距離太近了。」糾纏一輪，盧宛茵還是買不到口罩。幸好鄭敬基及時來電，「佢好有心，耐唔耐就同我打招呼。佢主動問，『肥媽你有冇？』跟住就即刻攞畀我。」鄭敬基在九一年的《卡拉屋企》飾演盧宛茵細仔。三十年來一家人仍有偶有聚會。
「仲有一個真係老友，哈哈哈！」講緊黎彼得，「佢好叻，識上網訂。收工時攞廁紙俾我。 佢話拎住出出入入被人笑呀！」其實七十歲的黎彼得比盧宛茵還要大幾年，「我真係要學啦，電腦我都唔識，又唔知去邊度學。」盧宛茵有兩子一女，都是為口奔馳的上班族。兩子已成家立室，有妻有兒，酷似衞蘭的小女兒仍與她同住，「啲後生冇乜耐性，由零開始教係辛苦啲。有時嘢問佢手機啲app點搞，佢話『得啦，我幫你整。』」
現時口罩的供應已陸續舒緩，但阿媽的作風就是慳儉，「盡可能重用，用完晾喺廳曬吓。哈哈，其實好幼稚。不過冇法。」蔣麗芸又蒸又焗實在係教壞阿婆。「有都留番俾個女用，佢要返工。我唔返工時，喺屋企就唔使用。」「我哋養仔女，仔女又養仔女。大家都係靠自己，而家真係冇話養兒防老呢樣嘢啦。」「最好就好似朋友咁，唔好敦起個款，『老咗就靠你』嗰啲。」
Madam Lo七五年結婚後做過十幾年少奶奶，八八年離婚後重出江湖，由花旦變成人眾人阿媽，依然熱愛演戲，「捱慣咗，有時拍到凌晨兩、三點，甚至天光，其實好攰。但入到廠完全係兩個人，成個精神晒，好得意。鍾意就係咁。」叫她煮飯反而艱難，「唔想學，冇興趣。又洗又切好煩，又驚人被油彈到。」「冇嘢做我真係唔得。好似呢輪咁，唔出街，食完又瞓，個人好悶。」她最想疫情過去，可以重拾外出聽音樂、happy hour的日子，「依家朋友都唔會同你出去，個個都驚。」
撰文：蔡慧敏
攝影：胡智堅
攝錄：LL Production House
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
來源 source: http://nextplus.nextmedia.com
|
鍾意就快D Share啦！
|
|
|
