鄧兆尊，「慈善伶王」鄧永祥（新馬師曾）的長子，現年52歲的他，在因父之名下度過了半生，今年是祥哥離世23周年，去年祥嫂亦因病撒手人寰，「祥哥之子」做回了自己——鄧兆尊，而同時擁有三個女朋友的他，人生亦充滿傳奇，日前鄧兆尊在永祥大廈接受《蘋果》獨家「尊訪」，揭開神秘面紗。
當年發生的鄧家爭產事件，鬧得沸沸騰騰，充滿戲劇性，比電影還要精采，大家茶餘飯後都會談論。那些年站在父親一方的兆尊，率弟妹與生母洪金梅對簿公堂，隨着去年祥嫂離世，母子情仇俱化輕煙！
兆尊日前接受《蘋果》獨家專訪時，談起種種往事，祥嫂在爭產事件中被千夫所指，身為兒子的兆尊，至今仍幫理不幫媽：「你問我呢，實質上嚟講，（祥嫂）係錯晒嘅，但我從來唔會喺人面前話佢錯，因為唔係好多人，接受到自己做嘅嘢係唔啱。佢曾經以利益引誘，叫我過去佢嗰邊，但我就好衰，覺得如果我一個人企過去，件事變得好balanced，就好難分到真係咩嘢。我始終覺得，阿爸之前同我講嘅說話、交帶我做嘅嘢，我一定要做咗去囉！」
兆尊講述當年母親離家出走後，有日父親認真跟他說：「求吓你！我想求吓你幫我一件事。」兆尊語氣凝重：「係用求呀吓！我老竇從未咁同我講過呢一番說話，係第一次，所以我話有咩你講，我做得到一定做，就係呢件事，其實佢要求幾難，老竇要我做敗家仔。你聽到都覺好奇呢？佢話要我喺平常生活扮演一個敗家仔，我開頭完全唔明，要佢講清楚少少，佢講咗一輪嘢，就係啲細佬妹可以自由發揮，但我要做到畀人覺得你不思進取、不務正業，老竇話咁樣，人哋係唔會理你做乜嘢，你喺度生活就安全好多。」
兆尊當年既然答應了父親，表面上他就依照劇本去扮演自己的角色：「不過老竇冇同我講要扮幾耐就bye bye咗，當你做過呢個角色，會發現真係要做係做唔到囉！你要做到自己乜都為自己，要開心、利益，唔理人哋感受先做到呢個角色。好彩我只係做表面，只係做到好似係，遊手好閒，但其實暗地裏做咗好多嘢唔使話畀人聽。」
這件事只有胞妹鄧小艾知道，因為祥哥指盡量少人知道比較安全。兆尊說：「佢想我保護到下面啲人（弟妹），我都話佢哋未入世。我覺得有啲嘢，佢哋做得唔係好好，我先出聲，成屋嘢我交畀佢哋做，有啲人問我交晒畀佢哋做，會唔會擔心有人會私心？有都控制唔到。其次係，私心一定有，冇就假，一定會為自己屋企有少少私心，只在乎另外嗰啲人睇呢樣嘢重唔重，在我嚟講我無所謂。」
扮演敗家仔這個角色，他覺得自己勉強算是及格：「起碼你都會問我，你冇嘢做喎⋯⋯點樣點樣，喺你腦出現咗（呢啲諗法），證明咗我做得似！其實私底下，我做過乜嘢冇話你聽啫！有人話叫我買股票，買公用股，我做乜唔使話畀人聽嘛！在我立場係穩，唔係博。我唔追求好富有嘅生活，其實我好低調，冇嘢唔見得人！」
時光回到1996年，那一年，已經80歲高齡的祥哥，發現祥嫂把他名下不少物業變賣，並把資金調往外國。祥哥一怒之下把原本屬於祥嫂持有的永祥大廈業權，轉到四子女名下。祥嫂獲悉後，在律師樓與祥哥炒大鑊，並一度揚言離婚，從此搬出永祥大廈，與丈夫、子女反目。翌年祥哥因家變太激心病倒，住院3個多月後逝世。當祥嫂知道祥哥遺產只分1元給她，公開直斥四名子女是「紅衛兵」，子女反指她是「武則天」，雙方勢成水火。
為祥哥辦喪禮期間，更發生爭屍大戰，連喪禮都分頭擺。鄧家子女拒絕母親祥嫂入靈堂，祥嫂另設靈堂拜祭老公。長子鄧兆尊更揚言：「不准祥嫂穿孝服，我們和她斷絕母子關係。」一番爭執之後，四子女終於同意祥嫂送祥哥最後一程。之後雙方終因遺產分配問題，對簿公堂，持續近10年之久。而剝花生群眾都各站一邊，有人幫祥哥的子女，也有人幫祥嫂，不過當年不少家族成員就覺得是祥嫂不對。
撰文：鍾國仁
攝影：沈健程
攝錄：林德雄、葉君海
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|
