楊千嬅壓軸現身東華慈善抗疫騷，演出前她接受傳媒訪問，透露留家抗疫期間肥了10磅。早前在家自我隔離的她，每日教囝囝Torres做功課，千嬅坦言感到做母親的壓力，而且深明溫書忌親人的道理：「真係會容易忟憎，不過都了解個仔多咗，所以我要學吓煮嘢食，平衡吓啲生活。之前，老師唔方便嚟，自己同佢跟功課，有時小朋友好似聽咗，但其實冇聽到，我又好緊張，呢排好啲，老師可以一星期嚟一、兩次。」
問她的廚藝有否得到囝囝的認同？千嬅笑說：「佢食晒，應該都OK，都係學啲基本求生技能啫！因為係佢叫我學嘅，有次佢話『其他同學啲媽媽會親自整飯盒畀啲同學帶返學，你都冇整畀我』，我都唔可以用忙做藉口。同埋最近真係多咗同家人、朋友傾偈，大家互相鼓勵、支持。」
不少夫妻因留家抗疫反而增加磨擦，千嬅認為很正常：「我自己走位，就嚟爆就閃，唔係使乜蒸個蛋糕要兩個鐘？呢段時間大家真係要相處，佢獅子座好鍾意安排啲嘢畀我做，半夜12點嗌我執廚房、執阿仔個書架咁樣。其實兩公婆度過到疫情之後，我相信可以一路行落去㗎」她笑言終於有時間與老公齊齊煲劇：「我真係未試過可以睇咁多劇，《愛的迫降》、《梨泰院Class》幾好睇，《夫妻的世界》就唔好睇住太勁，應該搞唔掂。」
此外，有份參與網上音樂會的周柏豪，直言感覺有趣：「最近冇乜機會演出，頭先綵排嗰陣，見到台前幕後感覺好熟悉，但係個方法又好陌生，不過最終都係想籌多啲善款。」他又透露囡囡Sonya已5個月大，開始牙牙學語：「佢識畀手手同轉身，不過就未嗌爸爸，冇咁快。而家見到我嗌『Un咕』，見到媽咪就叫『奶』，同佢拍咗好多片、影咗好多相。」
而鄭融表示久未參與慈善演出，最近多留在家中避疫：「最多都係行山、放狗、喺屋企拍片，去市區個心情會好緊張，因為距離太近。」她亦有意今個月舉行小型網上音樂會：「我哋係藝人，呢個時候，真係想娛樂大家，呢啲時候都有好多正面嘢可以做，令大家開心啲。」
千嬅壓軸出場，她先與及周柏豪合唱《背後女人》，之後表示經歷今次疫情，有很多感受，令她醒覺到最重要活好自己，而家人和身邊的朋友能齊齊整整、健健康康才是最重要的。千嬅指想不到演出原來可以是一件難事，而她與周柏豪未有避忌，在台上攬攬。雖然千嬅獲安排壓軸演出，但她全晚只唱得1首半歌，她大叫唔夠喉。
採訪：盧妹
攝影：林賓尼
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|