2020年5月15日星期五

【頭條戲場】《無痛斷捨離》衰女人的贖罪券

阿靜交還相機給前男友，而前男友亦將舊物交回畀阿靜。

導演係拍《戀愛病發》嘅Nawapol Thamrongrattanarit，女主角係《出貓特攻隊》嘅Aokbab，仲有泰國男神，《大佬可以退貨嗎?》嘅Sunny，因為以上三個人，所以無睇任何介紹就入場睇，結論係一套唔算浪漫但會睇到戚戚然嘅愛情片，適合在愛情路上習慣自私，覺得自己無問題人哋錯晒嘅人觀看。全片最佳對白，「有些事你假裝忘記了，但不代表沒發生過。」(上映中)撰文:廖思慧

故事好簡單，設計師阿靜（Aokbab 飾）好鍾意北歐簡約風，打算將亂到七彩的家居變成空間感十足嘅北歐屋企，首先你要有間屋，咁佢有仲要非常大間，因為老竇剩落畀佢，然後就要大掃除，佢受到日本「斷捨離」意念影響，即「斷絕不需要的東西；捨去多餘的事物；脫離對物品的執著」。

有啲女人真係好乞人憎

阿靜好努力實行，執吓又睇吓，然後佢發現大量物件，包括陳年朋友借畀佢嘅物品、某年某日佢幫人買過嘅物品、積聚好多年的生日禮物及前男友(Sunny飾)的菲林相機。沉迷「斷捨離」加上性格比較無情，阿靜愈掉愈多，之後因為老友一句說話喚醒咗佢。原來當年阿靜曾經一聲不響離開前男友，不傷不痛地活了多年，因為一部舊相機，阿靜突然覺得要好好完結，佢決定將相機親手送返畀舊男友。Well，有啲遺憾唔係你想彌補就可以彌補，亦唔係你想幾時道歉，人哋就隨時Ready原諒你，麻煩留意返，贖罪券可以用但唔代表對方要接收囉。