2020年6月10日星期三

出新碟搞兒童繪畫大賽　艾粒獲網友九唔搭八回應勁搞笑

艾粒話本來唱片封面諗住好似左邊兩組日本明星咁靚，可惜變成右邊咁樣，所以唯有搞繪畫比賽。

艾粒去年4月舉行完兩場《艾粒Boom紅館激戰》演唱會後，今年除了出了新歌《戴了口罩你最美》外，原來仲打算推出新碟，呢日阿占（Jim）和阿奴（Ronald）就分別出Po宣傳，仲話之前決定舉行「艾粒兒童繪畫大賽」，10歲以下小朋友就可以參加，勝出作品有機會成為艾粒新歌線上封面。

阿占用了日本組合KinKiKids相，再寫：「即係本來我幻想艾粒嘅唱片封面係咁靚仔嘅，但出到嚟變左第二件事，有見到及此，我地即將推出全新作品之前，決定舉行［艾粒兒童繪畫大賽］。勝出作品會成為我地全新單曲線上平台封面，亦會得到亞加力膠獎一個，可能仲會有小一面試同學最鍾意嘅爛鬼證書一張。參賽作品請inbox我或者Ronald，參賽年紀方面不限，但係10歲以下。」而阿奴就用日本女團乃木坂46的秋元真夏同櫻井玲香合照，並留言：「原來幻想艾粒唱片封面係咁，可惜想得太遠，又唔照鏡，出到嚟係另一回事，唉！由於艾粒好日都唔出新歌，所以我哋決定舉辦「艾粒兒童繪畫大賽」，等一班細路出手畫我哋，勝出作品有機會成為艾粒新歌線上封面，另外喺砵蘭街膠板店製作的巨型迷你獎狀，以及爸爸媽媽最happy嘅小朋友證書，拎去入學面試真係一流！年齡不限，十歲或以下或以上或以左或以右就快啲參加！等你作品」

由於佢哋出Po都係一貫無嚟正經，所以網友回覆時亦一樣九唔搭八，譬如話：「請問樣似十歲可唔可以參加？」、「心智10歲以下ok？」、「你隊組合仲有，以為解散咗」、「唔好話俾我聽最後得獎係您個仔呀下」、「我老公堂本光一堂本剛」，反應相當搞笑，可惜真係話參加嘅人唔多囉！