2020年6月18日星期四

晒赤膊照向胡子彤學習　吳肇軒盼早日成「露體魔人」 #胡子彤

晒赤膊照向胡子彤學習　吳肇軒盼早日成「露體魔人」

吳肇軒稱要向胡子彤學習，早日成為露體魔人。

影壇小鮮肉吳肇軒、胡子彤、朱鑑然和林家熙好老友，早前仲孖住一齊去沙灘Camping，天氣咁熱，運動員出身的胡子彤和朱鑑然梗係要除衫晒肌啦，不過睇勻成輯相，唔知係怕俾蚊叮？抑或怕身材被比下去呢？吳肇軒和林家熙就全程都好密實。事隔1個月，昨日吳肇軒忽然於IG貼出一張赤裸上身瞓喺帳幕的相，雖然兩點同腹肌都巧妙地遮晒，基本上都冇乜嘢睇，但他揚言：「向胡子彤學習，早日成為露體魔人。」相信是打算努力操肌。

對此，胡子彤留言：「喂，我邊有啫。」否認是「露體魔人」，不過唔知係咪有人會錯意呢？吳肇軒即Tag其餘兩兄弟並謂：「佢話佢冇。」究竟係冇咩呢？林家熙就幫胡子彤解圍：「佢都唔係呢個意思。」咁係咩意思呢？大概只有他們4人先Get到。另邊廂，蔣雅文妹妹蔣雅詩都有留言，她打趣道：「唔好喺我面前露兩粒（點），我會剪走佢。」睇到對方咁「暴力」，吳肇軒都即刻笠水說：「um...唔好跟我去沙灘玩。」笑死！