昔日男神湯鎮業與胞兄湯鎮宗，80年代起縱橫中、港電視圈，湯氏出名遺傳基因優良，近年他們的下一代陸續接棒，踏足娛樂圈，個個有樣有學歷非常高質。湯鎮宗女兒湯洛雯2012年參選港姐入行，現已成為大台花旦，近日更與城中筍盤馬國明公開認愛；而湯鎮業與首任妻子姜坤所生的大女愛嘉與一對孖仔君慈與君耀，也隨堂家姐先後入行，孖仔更亦於2017年簽約甄子丹旗下，進軍電影圈。
最近，湯氏家族再有成員投身娛樂圈，湯鎮業的外甥李子熙（Daniel）去年於公開大學修畢動畫及視覺特效學位，畢業後即投身娛圈。現年23歲的Daniel絕對是走陽光男孩路線，皮膚白皙的他總喜歡使出冧爆甜笑絕招，他笑言希望以笑容來取悅大家。對於來自明星世家，覺得全家也有靚樣基因？Daniel笑說：「真係咁啱得咁橋，梗係成家都靚」Daniel毫不介意被指靠家人的名聲入行：「始終佢哋都喺呢行真係成功，我做番自己嘅模特兒工作，唔會特別介意。我入行都可以話係因為佢哋，第一次俾人叫咗去試鏡，好順其自然咁，而家簽埋公司，有job、有廣告繼續做，以前冇諗過呢樣嘢，而家開始接觸，都覺得好神奇，好自然咁發生。」
出身於大家族，Daniel與家人的相處很有愛，談到跟家人的相處點滴，他說：「我由細到大都好驚三舅父湯鎮業，因為佢嘅氣場好強勁，好有威嚴，其實佢係隨和嘅；二舅父湯鎮宗平時都好少嘢講，細個成日會去佢屋企玩；孖仔就由細玩到大，我都成日去佢哋屋企，一齊做gym，一齊嘅時候玩多，唔講工作嘅嘢。其實屋企人知道我入行都冇乜意見，舅父就會叫我睇多啲戲，好似學語言咁，聽得多睇得多先會講到，佢有講過眼神好重要，做戲好睇對眼，舅父會用前輩嘅身份去講畀我知。」至於蜜運中的表姐湯洛雯，Daniel坦言恨見未來表姐夫並說：「好戥佢哋開心，佢哋好登對，希望佢哋開開心心、幸福快樂！早啲拉埋天窗。馬明真人仲未見過呀，都好想快啲見面，我覺得佢係一個好好嘅前輩，好多方面都好值得去學習，如果見到面，都會請教佢，想跟佢學做戲。」其實知道Daniel入行，靚湯不時會關心提點：「表姐會同我分享，就算食飯嘅時候，佢都會問我做模特兒做成點，問我會唔會入TVB同選香港先生，不過要着三角泳褲，我唔夠膽。其實同佢嘅相處，最記得係我細個好百厭，試過跳爛佢張床，細個佢好驚我上佢屋企，不過我哋由細玩到大，而家感情好好，佢好弗呀。」
Daniel在19歲時被星探發掘當上模特兒，今年正式入行，曾經拍過維他奶、滙豐銀行、GU、中銀等廣告，能夠在現時淡靜的市道保持工作量，相當難得。Daniel喜歡看電影，一星期睇足5天，他最喜歡的是吳彥祖，難怪連英文名也相同，他說：「其實自己好鍾意睇戲，有時見到啲男主角好型，會幻想係自己（係男主角）。我鍾意吳彥祖，細細個睇《新警察故事》覺得好型，佢去到40幾歲都係咁，我都會幻想自己去到40歲都好想似佢保持得咁型！而家入咗行好多嘢都未試過，想試多啲唔同嘅嘢。我睇戲好鍾意睇搞笑嘅戲，自己都應該可以搞吓笑。」
自言靠賣笑容的Daniel，被問到會否考慮參加《全民造星》，成為姜濤師弟？Daniel笑說：「應該唔會嘞，啲人太勁，一係唱歌好叻，一係跳舞好勁，自己唔夠佢哋嚟！我強項？笑容OK面皮夠厚，鬧我都OK！」別看Daniel白白淨，原來他近年愛上菲律賓魔扙運動，這是一個考反應的運動：「平時每星期都會玩4、5日，因為菲律賓魔杖係好考反應，又可以練臂力，只要你手上揸住咩嘢武器都可以練到，所以係一個好好嘅運動。以前細個唔係好好動，不過就好百厭。」至於感情生活，他笑言現時沒有女友，21歲仔才嚐到初戀之味，不過維持了一年便因性格不合分手，認為搵女朋友不用太靚，但也要睇得，認真是少男心事。
採訪：羅慧敏
場地提供：My Fitness
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
