現年26歲ViuTV「32D爆乳小花」楊偲泳（Renci）初出道時一份青澀味被封「文青女神」，藝人和排球員的雙重身份，加上不經意地展現fit爆性感身材，去年和大台上位小生張振朗公開認愛，未知是否和公司有關，二人拍拖以來從不公開放閃，但私下楊偲泳激冧張振朗暖男一面，男友給予的一份安全感令她盡情放膽去愛，無論工作或私人感情都可以分享，經歷高山低谷。
楊偲泳一直效力ViuTV，由初期主演綜藝節目至近年專注拍劇，去年有機會客串電影走進大銀幕，早前她有份參演林保怡監製劇集《歎息橋》，挑戰演16歲少女，年輕角色與真實年齡相差十年時光。近年影視圈予人男女演員都有青黃不接的印象，楊偲泳反駁：「我哋一班新人都好努力去話畀人知唔係青黃不接，好努力去追，畀多少少空間我哋，唔會令人有斷層感覺，我對演戲仍然有團火。」林保怡在《歎息橋》大膽起用一班後生仔女，楊偲泳多謝劇集信任新演員：「今年初工作好艱難，唔好話新演員，資歷更深都未必有工作，何況我哋？呢個時候《歎息橋》畀到強心針我哋，可能大家對新演員好陌生，成日話類近邊個，我都俾人話我似好多人，會唔會有令人值得欣賞地方遠過於茶餘飯後話題呢？我要爭氣去建立鮮明形象。」
楊偲泳性格好動又想擁有一身健康膚色，身為排球健將自稱「坐唔定、唔悶得」，近年除了打波健身外，還學習拳擊，也喜歡出海，享受運動過後入眠的滿足感。運動亦成為她與男友張振朗共同嗜好，話說回頭，兩人既沒有合作也不同公司，卻牽引在一起，楊偲泳說︰「緣份……詳細認識唔記得，我覺得好神奇，生命突然出現咗一個人，下一步要好好珍惜，努力經營。」拍拖以來兩人從不放閃晒恩愛，在互聯網中難以找到二人合照，她解釋︰「一向都低調，生活因工作多限制，想保留私人空間，大家舒服就得，我哋冇刻意迴避任何人。」兩人去年先後被本報追訪男方到訪女友家做節及到中環嘉年華玩遊戲，張振朗一擊即中贏取公仔冧女友，感情甜蜜穩定。
對戀事她對答爽直，大方談及近況，畢竟二人來自不同公司，大台出名小器多掣肘，愛得低調是否和公司有關？她說︰「我哋冇特別諗呢樣嘢，相處時間唔係特別多，反而關注於幾時可以見面，食飯拍吓拖，一齊去生活。除專注工作外，想搵一個人同你生活同成長，唔係單拍吓拖只做開心嘢，反而係好與壞、開心唔開心大家去經歷，對我嚟講緊要過所有嘢。」雖然分開拼搏，但張振朗在她心目中絕對是位貼心男友，楊偲泳甜絲絲說：「佢好珍惜我哋相處時間，有時大家工作收好夜，佢會返到家半夜三更換件衫走出嚟，食個消夜送我返屋企，一啲好細微嘢，對我好窩心，明白對方呢個苦心，可以睇得出大家關係有幾重要，自己喺細微中感受到。」
楊偲泳曾因工作情緒起伏，認識張振朗後有很多值得她學習地方，坦言：「開心時所有嘢都好，最重要能夠壞時一齊度過而唔係事旦一方去嫌棄或放棄個力度好大。」並對男友投以百分百信任，她分享：「我記憶中好少畀另一半見我喊，會匿埋喊，以前係會包拗頸，逞強就得，唔好理我，但慢慢見人多咗，總會有個人可以你喺佢面前喊出嚟，去抒發，呢個崗位好緊要，令我放心去抒發，佢就係我身邊呢一位。」二人情侶關係穩定，談婚論嫁言之尚早，但慶幸大家信念一致，長遠發展相處，不會刻意設定期限。
採訪：卓寶花
攝影：沈健程
DV攝錄：林賓尼
髮型：Nick Lam @ Orient4.com.hk
化粧：Carmen Chung @ carmencmakeup_hair
場地：Morokok
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
