獲Do姐點燈大合照企隔離 黃庭鋒：好想同佢做節目
32歲，懂得四種語言嘅黃庭鋒（Telford）深受TVB力捧，除咗同譚玉瑛等主持新一輯《香港原味道》外，上周仲拍住女神馮盈盈喺《萬眾同心公益金》度幫手做菜。稍後演出新劇《飛虎之雷霆極戰》。
昨日黃庭鋒又有新嘗試，今次應邀參與《Do姐有問題》，跟女子組合Super Girls（SG）成員Jessica（蔡明思）、Aka (趙慧珊)、孔德賢玩遊戲。Do姐向來對「小鮮肉」都心心眼，而大合照中，庭鋒企正Do姐隔離，連好拍檔農夫都彈到最開，對此，庭鋒笑言唔係受寵：「純料工作人員安排企位，其實我唔係第一次同Do姐合作，之前曾經接受過佢主持嘅電台節目訪問，只係今次玩遊戲，Do姐超級公平公正。佢係我其中一個偶像，不論主持及演出都好犀利，相當有感染力，而且仲係與時並進，好努力嘅藝人，值得後輩學習。見到Do姐，我唔會用驚去形容，反而係好想同佢做節目。」
年前庭鋒奪得總值過百萬嘅台慶壓軸大獎，問到今次能否爭取到可觀現金獎？他就賣個關子，笑說：「我同孔德賢一組，今次拍攝峰迴路轉，經歷咗高山低谷，雖然之前都有做定功課，尤其重溫Do姐經典劇集，但現場好考眼明手快，辨聲能力，好彩有陸永幫手做邏輯推理，幫到我哋好多，覺得今日好好玩，Do姐同農夫合作無間，令到個氣氛超正，其實贏唔贏到現金獎係其次，我反而好享受過程。」
來源 source: http://hd.stheadline.com
|
鍾意就快D Share啦！
|
|
|
