富豪搭叮叮
53歲鄧兆尊最為人津津樂道嘅，就梗係擁有三個女友享盡齊人之福，以及起碼15億身家啦。雖然佢成日強調自己無乜錢，但你信唔信？可以確信嘅係，佢呢個隱形富豪，真係生活得好貼地、低調。
鄧兆尊貴為已故慈善伶王新馬師曾（鄧永祥）個仔，窮得去邊吖，大幅西貢地皮揸手喎，賣埋永祥大廈同楚留香物業套現喎！何況據聞阿媽洪金梅（祥嫂）留低15億遺產畀佢四兄妹，俗啲講句：「打跛腳，幾世都使唔晒！」
有錢到咁，出入唔請司機都搭的士啦。偏偏，鄧兆尊選擇曬住太陽排隊等叮叮（香港電車）。香港又焗又濕，就算有風都係熱嘅，而鄧兆尊等車前仲四圍撲，先去眼鏡舖，再去電訊公司，搞完一大輪仲要曬住排隊，肯肯定底褲都濕埋，隨時熱到個人發忟憎。不過，佢專心把玩新買嘅眼鏡，不亦樂乎，睇得出佢份人情商管理好好。
講感情唔講愛情
呢一點（情商管理），睇佢做訪問談及三個女友就知，例如對於女友們外形嘅批評，佢表示：「批評我一向唔睇，睇咗都係得啖笑，鬼唔知你帶出嚟啲女愈靚愈索係好事咩！我後生時都有靚嘅女朋友，但睇你個人有無感情囉，唔通你身邊人慢慢年華老去，你就唔要佢咩？我又唔係玩家，玩家先係咁啫。我係個有心腸嘅人，同埋一個人去到某個年紀就唔係講愛情，係講感情。」有無少少改觀，由笑佢變欣賞佢？當一個人有錢又有女，少不免有人話啲女係貪錢。鄧兆尊自有一套處理之法，佢接受傳媒訪問時提到：「我唔覺得佢哋（女友們）同我講金，講金唔會黐住我。我會先畀一筆錢佢哋，唔係每個月畀。通常我畀得一筆對方，就認為對方唔係拜金嘅人。如果佢好快使晒，但其他人有排都未用完，咁佢係咪要反醒吓呢？」
扮敗家仔生存
鄧兆尊予人感覺，就係點睇都唔似個上流富豪，但佢言談間又顯得幾有智慧。或者，受佢爸爸臨終前嘅告誡影響好深。事關新馬師曾要佢做敗家仔，「要做到畀人覺得你不思進取、不務正業，咁樣人哋先覺得你無攻擊性，唔會威脅到人哋，咁就唔會理你咁多，你嘅生活就會安全好多」。講到咁，聯想起宮鬥劇嗰種攞你命嘅勾心鬥角與黑暗，亦有少少get到點解鄧兆尊咁樣生活。----------------------------
無懼白色恐怖 黎智英劉細良開講抗港版国安法
立即收看ChannelNEXT《人民學堂》
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|