29+1喇！嘉欣有好多嘢想做，解鎖自己成就～
無綫花旦龔嘉欣剛剛踏入娛樂圈第十個年頭，絕對是一個關口。很多後生一輩，30歲仍然一事無成，戶口得個零之際，嘉欣最近卻以900多萬買入人生第一層樓，亦於此時做埋老闆娘於馬來西亞開火鍋店。女人30可能已談婚論嫁，生兒育女，嘉欣坦言一定會生小朋友，但更喜歡工作的她，揚言下一個目標是攞視后。
年初買樓開舖，完成置業心願，但一切卻得來不易，她說：「我好怕搬屋，以前搬屋搬到喊，一路都想有個安樂窩，但唔容易，有份壓力喺度，尤其係現時經濟咁樣，好多嘢唔喺自己控制範圍，盡力做好自己。」堪稱「圈中小富婆」的她大爆由十多歲做模特兒開始，就有儲蓄半份糧的習慣：「我有兩個戶口，出糧直接入B銀行，跟住將一半過入A銀行，永遠只會用B銀行嘅錢，A銀行嘅錢我係唔會用，A銀行嘅提款卡永遠唔帶出去，萬一唔夠用，先會喺A銀行搣少少過去，我只係鍾意儲錢，我唔識投資，我係一個好保守嘅人，有人叫我買股票，我唔買，只會擺定期，我又唔會有好大物質欲望，自己好少買衫買袋，一條牛仔褲着幾年。」
人生去到29+1，條路的確不易行，於馬來西亞開火鍋店，坦言壓力大到3個月沒有經期。入行10年，她成長不少，但她說：「其實我覺得呢10年我冇乜大改變，以前唔識諗咁多，依家會諗點可以再勤力啲。（負擔大咗？）今年30歲係一個關口，冇藉口再話自己係細路女，為人為自己都要諗多啲，我嘅事業由攞咗『最佳女配角』之後，應該要行上多一級。（有咩目標？）梗係攞視后（《殺手》有冇機會？）呢部劇我付出咗要做嘅嘢，對得住自己、對手同監製。」
嘉欣於現時熱播新劇《殺手》中飾演殺手，可謂博到盡，她坦言拍前不知如此辛苦：「本身自己係手腳唔係咁靈活嘅人，有啲動作要好努力去做，劇中同陳豪、黎耀祥好多對打戲，就算打到斷手指筋，全身瘀傷都唔識驚，幸運對手係祥哥（黎耀祥），拍攝時佢好遷就我，令我好容易投入到。」說到與黎耀祥年紀相差廿多年，劇中有段「微妙」愛情，問她能否投入？嘉欣說：「梗係投入到我諗真係經驗！（父女戀喎？現實生活中接唔接受到？）應該唔得喇！暫時我想像唔到，發生機會係好低。（未試過有呢啲『熟男』追求你？）梗係冇我爸爸都係五十幾歲，對方大過我爸爸我接受唔到囉！做戲就OK嘅！」問到情願拍呼天搶地的喊戲，還是打到落花流水的動作戲？她說：「兩樣都好難，揀唔到，其實今次都好多喊戲，監製要求唔同咗，要嗰一吓先可以喊，講完嗰粒字先可以流眼淚，我又做到喎！自己都有份交代，亦都成長咗。」
來源 source: http://hk.on.cc
|
鍾意就快D Share啦！
|
|
|