武漢肺炎第三波大爆發，幾乎每日都有約50宗確診個案，不但學校提早放暑假，戲院、海洋公園、迪士尼、美容院等要停業，書展和動漫展要延期外，《蘋果》收到消息，就連鍾嘉欣收300萬酬勞重返無綫接拍的新劇《兒童醫院》，都因疫情嚴峻關係，家長擔心小朋友演員被傳染，劇組亦唔敢承擔責任，所以遇上阻滯，有小朋友在場的戲份拖住冇開工，只能先跳拍少量嘉欣與馬國明嘅戲份。
嘉欣於2015年遠嫁加國脊醫Jeremy Leung後，三年抱兩育有一子一女，2017年拍完《再創世紀》跟大台約滿後淡出娛樂圈，直至最近才決定復出，上月疫情稍竭，嘉欣特登飛返香港隔離14日準備開工拍《兒童醫院》，與馬國明和鄭嘉穎合作，怎知隔離完畢後疫情大爆發，最麻煩是劇集以兒童醫院為背景，有好多小朋友參與演出，但現在學校因疫情停課，家長擔心子女會被傳染，劇組沒人敢拍板叫小朋友開工，惟有採拖字訣望天打卦，拍攝進度受影響，分分鐘要拖到明年才能拍。而本預算只回港幾個月拍劇的嘉欣，如今可能要明年再回港完成劇集拍攝，對照顧家庭和子女的時間分配大失預算！
消息指馬明本身拍完《兒童醫院》後，隨即投入另一部新劇開工，身為視帝的他事先跟大台講明，唔要兩部劇叠住拍，如果《兒》未能如期開工，馬明稍後就要入另一個劇組，唔可以同時拍《兒》，不想大家一齊等運到嘅情況下，劇組惟有先跳拍少量馬明有份的戲份，但主要戲份都有小演員，相信成套劇要拖到明年才能再拍。而上月返港預備開工的嘉欣，在隔離期間專心睇劇本，上周一出關返電視城試造型，怎知遇上疫情大爆發，一直在等開工的她，因拍攝進度受阻不用趕戲，閒時在IG貼相，去剪頭髮、約黎諾懿食飯打發時間。前日下午約4時許，嘉欣由助手駕車送返位於將軍澳住所，戴cap帽、口罩和黑超遮面的嘉欣，在路邊落車快步行返屋苑，其間記者上前打招呼，嘉欣耷低頭狂耍手，問到拍劇有否延遲？她同樣耍手沒答，匆匆進入大廈，而當嘉欣揚起手時，她的左手沒有戴上婚戒，未知是否返港等開工關係，才不戴婚戒呢！
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|