武漢肺炎在港爆發第三波，衞生防護中心前日（18日）公佈出現新診群組，一班藍絲到旺角雅蘭中心稻香舉辦「慶回歸」聚會，先後已出現4名確診者。雅蘭中心有多個樓層的食肆，而賭王三房千金何超蓮在同一個商場的二樓開了她代理的台灣牛肉麵店，《蘋果》前晚到過該商場，見商場食肆樓層人流近乎零，由於政府「加辣」，於上星期三後實施6點禁堂食，昨日下午再公佈延長多一個星期，只可外賣的新措施下，見超蓮的麵店只有店員及廚房人員呆坐，似乎未有客人幫襯外賣。
《蘋果》今日聯絡過超蓮，她表示睇到新聞知道商場有其他食肆公佈有確診者：「佢哋喺4樓，我哋麵舖喺2樓，我哋不嬲都有做咗好多防備，消毒清潔，會為客人量體溫同提供酒精搓手液，有板隔住，所以我哋唔太擔心，衞生情況係ok。」問到她近月生意有否因疫情大受影響，超蓮就大歎經營環境險峻：「老實講，我哋已經捱咗幾個月，上個禮拜開始政府又開始禁6點堂食，更加難搞，我諗同其他食肆一樣，都係好難做雪上加霜，加上我哋賣嘅係湯麵，外賣更加難，同唔係我哋主要收入，同埋疫情確診人數上升返，商場係少咗好多人流。」再問到她的生意額跌幅多少，她說：「呢兩個月實質數字要問返股東，我之前個幾月忙阿爸喪事，間舖運作係股東幫手頂住，個疫情由1月開始，我哋生意都係好受影響，有時真係得千幾蚊一日，而家確診人數又多返，可以同你講，我哋禁堂食之後係試過晚市係零，生意係完全唔夠交租。」
記者再問到她銅鑼灣店是否一樣捱緊，她表示：「銅鑼灣店生意當然都有受影響，但業主好好，有主動減租，大家共渡時艱，同埋呢間我哋有賣包裝麵，可以幫補到少少生意；而旺角嗰間，租金實在好貴，我哋呢幾個月不斷有同大業主傾過，佢哋有兩個月減咗少少租，不過我哋剛剛又收到通知，9月會加我哋租，其實唔止呢個月我哋係蝕緊錢，呢半年因為疫情關係，我哋係蝕咗200萬，我哋真係捱住同守住，一路都無炒過員工。香港飲食業大部份食肆而家生意少咗，要守住真係要業主可以幫幫手，我同啲股東都不斷開會研究仲有咩可能性，都係畀心機盡做。」
超蓮於2018年將玖五台灣牛肉麵引入香港，先在銅鑼灣開舖，她的不少明星朋友都有來幫襯成為人氣食店，之後今年就在旺角雅蘭中心開新舖，於1月中試業，2月正式營業。該舖的大業主是恒隆地產，自2月中曾有報道指有商舖轟恒隆對部份商場租戶苛刻，追租不減租，亦因社會事件「封場」，令商戶生意難做，更有小商戶不滿恒隆對外公佈幫助中小企，但實際上從沒支援方案。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|