曾在《頭條新聞》主持「驚方訊息」環節寸爆警方的王喜，今日接受《蘋果》訪問回應《警訊》下月結束說：「因為伍曼儀嘅回應，冇好清楚講出究竟係邊個提出分手先，亦都冇提出分手原因，咁所以呢我有以下落嚟嘅呢幾個唔同嘅推算，咁睇吓中邊個啦。第一個係『港台提出分手』，但伍曼儀回應話成功爭取做到8月中，睇嚟唔似港台提出分手嘅，所以呢個可能性比較低。」
王喜續分析剩餘的2個可能性：「呢2個可能性都係『警方提出分手』，不過由乜嘢人決定警方要提出分手唔再做《警訊》，就有兩個可能性。（其中一個係）呢個人係喺香港警隊之內嘅，如果係香港警隊之內，有一個警察決定終止同港台合作去做《警訊》，咁呢個香港警察可能係而家3萬個香港警察當中最先表露身份嘅一個白警！」王喜覺得只有「良心發現」先會提出分手要求：「無法再忍受自己去製作一啲連自己都唔相信嘅公共事務節目，繼續去教育市民喺遇到危難嘅時候要去搵香港警察幫手。我諗佢因為良心發現，所以連呢啲說話都唔敢再相信，所以佢先至忍痛決定唔再做《警訊》。」至於他推測的第3個可能性，是來自警隊以外的人：「佢去指示、命令、迫逼使香港警察向港台提出分手唔再做《警訊》。」王喜又認為，如果以上兩個可能性屬實，以後不會再有港台製作的《警訊》，可能會在TVB、亞視或者大陸電視台之手重生，然後在珠江台、中央台或者TVB播。
提到《警訊》要講bye bye，王喜認為：「如同任何長壽節目一樣，對於舊香港人嚟講有好多美好嘅回憶，都逐一消逝。而我哋從前曾經依賴、信仰甚至乎從《警訊》當中去學識如何去辨別騙徒、點樣去將自己同罪惡保持距離，甚至乎我哋藉住《警訊》去知道警察犧牲咗幾多嘅時間、血汗去保衞我哋香港市民財產同埋性命，隨住舊香港已經隨風而逝咁樣，呢啲曾經陪伴我哋長大，同埋依賴嘅警務知識嘅資訊節目，亦都消逝，除咗可惜之外，都冇其他嘢可以講啦。」
王喜再補充稱，若觀眾想知道香港警察一些最新動態，或怎樣可以令自己生活安全和有趣些，可留意網台《喱騷》中，由他主持的《驚訊》。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|