運動，依靠絕對的自由意志，每個動作每次郁動全憑自己，沒人可以強迫，亦沒人可以代勞。人人目的有別︰有為減肥；有為健康；有為挑戰自己，舞台劇出身、近年轉投大銀幕《金都》的男主角朱栢康，為的是「表演者的readiness」，簡單講即是「練好功夫等運到」，為此他專誠走到美國及台灣學習身體訓練，時刻「操好副偈」等待機會。
朱栢康憑電影《金都》為人認識，日前在銅鑼灣接受《蘋果》專訪，他說：「演員keep住有身體訓練嘅習慣，就算要做肥做瘦（角色），身體嘅適應力都大啲、可以負荷（程度）都強啲。體態美固然重要，畢竟觀眾都鍾意睇so-called好睇嘅嘢，對我嚟講，個偈先最緊要，因為身為表演者個readiness先最重要。」
朱栢康最初開始做運動，全因師兄張繼聰：「嗰時見到佢由好瘦練到好大隻，覺得佢好勁，令我覺得演員保持體態係重要。」當時迷上CrossFit的他，更到美國上了兩個月堂：「嗰時香港唔係好興，所以要去美國學，做咗兩年左右，我就去咗學芭蕾舞，之後有期好流行街健，我又去試。到爸爸病咗，我就drop低所有嘢去照顧佢，一停低咗啲傷患就出晒嚟，睇醫生都醫唔好。之後我就去台灣跟水池老師學身體訓練，跟佢4、5年，由有肌肉變到冇哂肌肉，不過身體嘅柔韌性好高，身體狀況好好。」為何突然轉學芭蕾舞？朱栢康只想探索身體，有老師告訴他在舞台上很放鬆，這是他最大的優點亦是最大的缺點，他說：「身體太relax就會變咗鬆散，所以我去學最極端嘅芭蕾舞。初初我同啲3、4歲嘅BB女上堂，跳芭蕾舞又要着tight shorts又要supporter，啲BB見到我係呆咗，嗰時冇家長覺得我係變態已經好好㗎喇。」
原本已離開健身室的朱栢康，前年重返健身室，同樣是因為張繼聰：「佢嗰時問我有冇興趣參演電影《金童》，入面我要做拳手，所以又開始操返。」做運動做到去美國、台灣上堂；做演藝亦由2005年樂隊朱凌凌熬了15年，到現在才讓他受注目，問朱栢康是否意志很強的人？他即笑說：「唔係，我成日呻：『好辛苦我喺度做咩呀？』我遇過好多意志好堅定嘅人，有困難都唔會出聲，我唔係囉。其實臨簽電視台前，我係諗住轉行，因為堅搵唔到食，表演亦去到瓶頸位。而家諗返，我唔係唔鍾意，係好攰，嗰個攰令我錯覺係討厭（表演）。大家覺得演員好多光環名利，有名利就好囉。而且表演者受嘅壓力好大，因為你嘅老闆唔止一個，係幾百萬人（觀眾）。嗰時覺得又搵唔到食，又唔覺得自己做得好，又大壓力，咁不如算啦。」
幸好，獲ViuTV邀請簽約做藝員，朱栢康才走到今天，博到單車變摩托。至於他的目標？朱栢康希望擔當主創，找來志同道合的班底：「我想創造多啲機會，因為我一個人都擁有唔晒。我經歷過好冇錢，冇經歷過好有錢，但係錢唔需要好多，最緊要有班兄弟，有錢一齊搵，有名一齊享。」
場地提供︰FITT PUB
化妝：Maggie Lee
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|