2020年7月10日星期五

【頭條戲場】《無定向喪心老友記》耆英爆Seed保家園

19年，電影代表阿根廷出戰金球獎最佳外語片力。

《無定向喪心老友記》係2019年阿根廷全國票房亞軍，亦代表阿根廷出戰金球獎最佳外語片。電影翻拍自76年阿根廷經典cult片《Yesterday's Guys Used No Arsenic》，刪減Out咗的情節及主題，保留原作的瘋狂黑色幽默及懸疑元素。由三個Uncle演員加一個Auntie演員孭飛，全部影帝影后級，因為對白夠Mean，串人鬧人直插入心，好笑夠毒超鍾意，片長129分鐘，完全唔覺。(剛上映)撰文:廖思慧

由阿根廷國寶級女星Graciela Borges飾演嘅Mara好鍾意懷緬過去，成日喺大宅重演攞影后獎一刻。

左起Mara嘅廢柴老公即前演員Pedro、狠辣導演Norberto及惡毒編劇Martin。

布宜諾斯艾利斯郊區有棟鄉郊大宅，入面住咗四個人，分別係曾經光芒四射嘅女星Mara(Graciela Borges飾)、佢個廢柴老公即前演員Pedro(Luis Brandoni飾)、狠辣導演Norberto(Oscar Martínez飾)及惡毒編劇Martin(Marcos Mundstock飾)，後兩者同Mara以前合作無間，亦同Pedro好老友，三個雄性耆英每日釣魚、打獵同打桌球過日辰，悶咩?咁退休係咁㗎啦。

陌生人當然要小心

咪以為有錢又有大屋住好好，其實Mara一直頂唔順老公嘅兩個死黨。一日，一對幾靚嘅年輕男女「闖入」四人的生活，當然呢個「闖」字唔係咁簡單。一直都話，有陌生人失驚無神對你好，九成九有蠱惑。然後Mara「驚覺」自己個名仲係好響，旁人歡呼吶喊搞到佢唔想再匿喺枯燥大宅同三個臭男人共度餘生，決意賣屋兼復出，三件雄性耆英決心捍衛佢哋嘅樂土，多場正邪食腦攻心計大鬥法展開，睇到我係咁笑出聲。

電影屬舞台劇式喜劇，劇本過癮，解構人性好到肉，一個演員都唔識，但睇得好開心。