癲癇發作撞爆眼角
大台劇《殺手》剛播完，而劇中飾演台灣黑幫頭目的53歲林利，已遷到台灣長住，仲話暫時不考慮再拍港劇。事關腸癌康復不久的他，又被癲癇症困擾，拍《殺手》期間因工作太辛苦，導致癲癇發作入院。
「《殺手》期間發作兩次，都係入醫院。因為撻低，最主要係撞到個頭，個腦震盪可大可小，會突然斷片、唔記得嘢，要慢慢諗返，其實每次都好傷大腦，我兩邊眼角都縫過針。我應該唔會喺香港拍嘢住喇，我身體目前來講唔得，拍嘢太攰啦。」林利說。
拍劇辛苦成誘因
原來，林利患有癲癇症多年：「癲癇好難完全好，又唔係成日發作，有時幾年一次，有時可能係攰、狀態唔好就會發作得密啲。發作時冇徵兆嘅，所以要成日keep住自己心態開心，同埋唔好畀自己太勞累。」17年他患大腸癌，完成切除腫瘤手術後不久就急不及待開工、登台唱歌，甚至為《殺手》遠赴台灣拍外景，仲要應付打鬥場口，導致兩次癲癇發作送院。「《殺手》期間發作最主要係攰，同埋啱啱做完腸癌手術，身體狀態、元氣仲未復原，基本上冇乜休息。人哋生完仔都要坐一個月啦，我劏咗個肚，一出院幾日後就開始唱歌、拍劇。」兩度昏倒令腦受創，為身體著想，決定暫停拍劇，只接輕巧應付的登台騷。「對我嚟講簡單啲囉，個時間唔使咁長吖嘛」他說。
新婚一年分隔半年
有無後悔唔錫身？林利斬釘截鐵話無！一來，他認為合適的角色，可遇不可求；二來，因為去台灣拍《殺手》，重遇追隨自己多年、收埋好多珍藏的台灣女粉絲Erin，二人火速撻著，更在去年七月拉埋天窗，給半百林利帶來第二段婚姻。不過因為疫情，這對新婚一年的港台夫妻，竟有半年時間是分隔兩地！林利身體欠佳，亦令這位「台灣女婿」更珍惜同老婆相處日子，故最終下決定：「以後都喺台灣生活為主。」
上月他在台灣展開新生活，兩公婆一齊做網購，一手一腳入貨寄貨，以首飾、玉器、手袋為主。何況比起香港，台灣多電視台，更多搵食機會，電視節目加商演，足夠兩口子生活。
讚台灣防疫好
講起商演，原來移居台灣的林利keep住有登台工作，飯碗沒受疫情影響。對此，林利歸功台灣防疫做得好，最主要係關封得早。「老實講台灣個防疫做得唔錯，台灣好早封關，我同我老婆都成半年冇見面，當時連我哋(有居留證的人)、任何人都唔畀入境。上個月29號一開放畀我哋居留證嘅人入，咁我就第一批返台灣。其他簽證、旅遊就冇，全部cut晒，只係畀有居留嘅人入。台灣啲登台、商演冇停過，大家生活都照常嘅，出面食嘢、任何嘢都係正常。台灣市面冇乜人戴口罩，上個星期先開始規定搭公共交通工具要戴。」最後，林利期望香港一切安好，疫情盡快完結。
----------------------------
無懼白色恐怖 黎智英劉細良開講抗港版国安法
立即收看ChannelNEXT《人民學堂》
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|