本周三才過35歲生日的雨僑，兩年前嫁給年少一歲的羅力威，兩人今日升呢做父母，羅力威昨晚在IG預告老婆今日入產房剖腹生B，雨僑今日向《蘋果》報喜誕下重6磅囡囡Harper，母女平安，雨僑笑言又心思思想生第二胎。
雨僑在疫情下陀B，大部份時間足不出戶，今日終於成功「卸貨」，她今日接受訪問時說：「今朝啱啱生咗，我哋都好開心。」疫情下生B，醫院有特別安排，雨僑續說：「以前冇諗過嘅就係疫情下生小朋友，因為老公要入產房陪產，我同佢都要做咗深喉唾液測試先可以入院，陪產員生完都立即走，醫院仲規定午飯、晚飯兩段時間先可以嚟送飯時陪一陣，老公、親人唔可以長時間喺房陪伴，同我預想中唔同，老公都係唔可以陪喺身邊。好彩今朝我都順利，精神各樣都好好，姑娘喺我生完立即畀我skin to skin抱BB，將佢黐住我心口，大家赤裸裸黐住，我好開心。」問到雨僑心急追仔嗎？她笑言：「啲人話一『卸貨』，搞掂晒就忘記晒所有嘢，就諗住生第二個，我都有少少㗎，生B原來咁一回事，可以接受，我都想再生，不過冇話一定要追仔，我覺得小朋友生兩個嘅話，佢哋有照應。」
雨僑懷胎時有做瑜伽，身形沒肥腫，今早產後在產房拍照留念時，即使素顏都上鏡，囡囡Harper都精靈可愛，她說：「我覺得囡囡似爸爸多啲，英文名都係爸爸改嘅，生女其實幾好，女仔較顧家。」
此外，新手爸爸羅力威表示沒有為BB剪臍帶，因為全程看着太太沒走開，但第一眼看到囡囡，心情難免會激動：「當然真係好感動，但同時都好緊張，亦都要陪住太太。」他笑言囡囡不似爸爸也不似媽媽，暫時最重要是讓太太身體復原，自己會好好照顧她們，之前還特意買了新車：「因為疫情關係，帽同口罩都冇適合BB嘅size，BB又唔可以遮塊面。始終而家嘅交通工具我哋都唔係超級放心，加上為咗方便老婆同BB，買咗架車就會安全啲、安心啲。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|