香港曾經多美好，怎可以不撐住？
62歲鄧達智（William)的時裝書拖了近十年，今年終在疫情下推出《衣路歷情》和《THROWBACK》兩本書，紀錄他40年設計師生涯。第一本出完，他卻確診武肺入院，下周第二本新書出街前夕，曾經令人驕傲的Made in Hong Kong，從此變作Made in China。㔁達智回看半世紀香港時尚起跌，由八九十年代黃金歲月，到九七回歸成為全球焦點， 「2020，我哋已經去到好詭異嘅時代，經歷咗好多嘢，冇法子去想像香港時裝業未來點樣，因為疫症之後，所有秩序都要重生，一日疫情未完，時間亦都未到！」
場地：香港朗廷酒店
鄧達智的訪問在上月初進行，新書及專訪本來計劃書展前出街，疫情下萬事不及預期。短短半個月內，書展取消、第二本書延期，鄧達智更中武肺入院，日日上港聞，出院後感受更深，「咁奇特嘅時間出現一件咁嘅事，感覺好奇妙。」
要數香港時裝史，近則要由60年代紡織製衣業昌盛、林鳳、十三點講起，恐怕非論文式、洋洋數萬字不足包羅。因為我們真的好鍾意香港，所以更加要珍惜走來不易的時裝路，「香港係一個好國際嘅大城市，幾十年時裝嘅波浪，我地係同國際同起同落。」鄧達智同步見証，論盡香港時尚在不同年代的轉變，還有遊走當中、引領風潮的香港女人。
＊六十年代—製衣業興起
代表女性：陳寶珠、蕭芳芳
「如果要講香港時裝，要由六十年代，我童年開始講起，《彩色青春》你𠵱家睇返幾俗都好，但當時真係劃時代嘅，定義咗香港一個年代。寶珠嗰時形象，係港人企同一陣線嘅工廠妹，喺一個困難時間；芳芳呢，就係大家理想中，仰慕嘅一個形象，希望生活改善，代表中產，識英文、讀書，當年佢着迷你裙、水手褲，係着得好靚嘅，個人又高，對腳又長，有齊所有條件去着。透過《飛女正傳》可以睇曬六十年代香港中後期嘅時尚。」
＊七十年代—名模走向國際
代表女性：名模許愛蓮
「我自己認識時裝時，最深刻係許愛蓮（Christina），佢係英文虎報記者，好高五呎九吋，經常唔化妝，剪個ｂｏｂ頭。嗰時六七年暴動，佢就着住白恤衫、卡其褲、綠色袋，拎住毛語錄混入人群去做訪問，佢係一個好大都會女性。其實佢先係第一個華人邦女郎，七十年代初，佢在巴黎做模特兒，Sonia Rykiel拖住佢出來謝幕。喺我心目中，佢好有代表性，第一個華裔模特兒去到呢個層面，好難得。」
＊八十年代—香港時尚起步 靚人滿城
代表女性：Joyce Ma
「香港經濟七十年代已經起飛，去到八十年代呢，進入黃金時代。我都係無端白事切入咗呢個黃金時代，麗晶酒店嘅Ballroom係冇一晚係冇function，有時你喺lobby望一望，可能Calvin Klein喺隔離，或者珍芳達嚟咗香港。」他那時由Ｂａｎｇ Ｂａｎｇ及長江的設計工作中，開始做自己設計的晚裝，「嗰時每個月我淨係訂做晚裝嘅收入，係多過我打工三倍，香港時裝嗰時係好好做，黃金時代！八十年代綜合都係靚人，朱玲玲呀，陳百強，好多。」
「最代表最代表，一定係Joyce Ma，因為佢帶領咗歐洲嘅潮流嚟香港，Joyce 係唔止香港，係亞太區第一間有齊咁多國際品牌嘅綜合性嘅Fashion Shop。令香港時尚氣息和全世界接上、同步，一齊進入黃金時代，Versace、Armani 、Yohji Yamamoto、Issey Miyaki等等，都係八九十年嘅。」
＊九十年代—九七回歸 全球聚焦
代表女性：薛芷倫、林燕妮
「九十年代面對回歸，所有國際傳媒都進駐香港，睇住香港點發生、點回歸。因為咁，全世界都關注香港，國際性exposure喺整個九十年代最利害，喺唔同範疇，亦因此得到好多益處，（香港時裝）亦進入一個黃金時代，係最成熟喇，全世界好多國家請我哋去做騷。嗰時最關注係ball gowns，嗰時真係薛芷倫時代，佢又靚啦，着衫又好，好有嗰個年代、要靚到最後一刻嗰種格調，真係好有代表性。」
「同一時間，九七年又好多移民，留低嘅又好水漲船高，走與唔走，有好多恐懼，導致好多家變呀，係一個好奇特嘅時間，喺Human History入面，無乜幾多個地方，係好似香港經歷九七咁，所有情緒混合嘅時間。」
「另一樣要講，係Ｇｉｏｒｄａｎｏ，佢嗰時係破天荒。佢係將過去嗰種馬獅龍、Ｂａｎｇ Ｂａｎｇ七八十年代嗰種服裝零售，個張度拉得更加大，個佔有率更加高，往後嘅，其他嘅都係跟他，就算Ｕｎｉｑｌｏ都係跟佢嘅路線咁去做。」
因為享受設計，亦不想重複做晚裝，鄧達智在九七年後，開始摸索了新出路，為港龍航空做制服，成為最早期的航空、港鐵、高鐵制服設計師。
＊二千年—香港時裝師北漂
代表女性： 馬詩慧
「香港回歸之後，大家要面對一個好大嘅落差。二千年前，Fashion係一件事，會去講；二千年之後，Fashion係生活一部分。內地開始好繁盛，2003年之前，內地係冇國際品牌嘅，對香港設計師嚟講，係好有利嘅，（香港時裝發展）以前嗰套，可以搬去佢哋度做，佢哋好想吸收香港嘅營養，亦好相信香港設計師講嘅嘢。」
鄧達智坦言那時享受國際設計師待遇，坐頭等機、出活動收錢、騷上出幾多套衫收幾多錢、肯謝幕另計，各類顧問費任收，當年未紅的黃曉明、范冰冰也企後排。
「當然只是短短幾年啦，之後佢哋培植咗本土設計師，好快出現幾代人，睇住佢地一大堆一大堆labels咁上，但去到2014、2015年左右，就又走下波喇，因為國際品牌湧啦，同埋加埋個勞動法，好多內地品牌、廠家慢慢消失。好似放煙花咁，一下去到最高，好短暫就完咗。」
「呢十年嘅話，我會諗起Janet Ma（馬詩慧），代表嗰種come back。因為佢喺八九十年代已經大紅過，當佢嘅細路大咗，佢再出返黎，出席咁多活動都咁受人歡迎，唔駛行騷，係坐喺度已經係一個氣場、佢先係KOL，media好錫佢、有觀眾緣。」
＊2010年至今—迷惘
代表女性：Sammi
「呢個係一個好詭異嘅時代，有網絡、有網購，加埋KOL、靠Marketing嘅年代，好困局。就算你已有名氣，好似Simone Rochas，佢除非有好大嘅如LVMH嘅backup，否則都好難生存；好似做得好好嘅Cos咁，你用Cos嘅價值，去買designers做、應該貴十倍嘅嘢。疫症之後，所有嘅秩序要重生，而家疫情未過，我哋要點樣去重寫個秩序呢，時間未到呀！」至於自己40年時尚人生，他總結為「作為一個設計師，我只能夠講，我慶幸我過咗，喺設計師可以用好proper去approach Fashion嘅時代，我係經歷咗。」
【近鄉情怯】
「我幾怕將自己擺上枱，呢個係自己專業，同埋，每個人都有一個理想，我而家achieve到嘅嘢，離開我理想好遠，我何德何能去做呢樣嘢（回顧）呢。」拖足十年，期間寫祖家元朗的食玩鄉情都出了幾本書，今年在書展迫在眉睫前，推出新書《衣路歷情》和《THROWBACK》兩本書，前者文字版由好友蕭芳芳、劉天蘭側寫鄧達智；另一本《THROWBACK》相集收錄他 40年時裝歳月，用圖片紀錄他由入行做Bang Bang、到80、90年代時設計Ball場晚裝，97年創作九龍皇帝系到，到後來開拓航空制服生產。一切仿如昨天，「97年前準備好一切離開香港，好朋友Jimmy Choo喺倫敦近海德公園已開workshop租定工作室，諗住兩個人一齊孖住上，有個照應咁，因為屋企事，返一返香港就一直留低。」
世事不似預期，最終趕到出書，但書展就取消了，慶幸在今年一片渾沌中出了書，公爵夫人上去度腳做鞋可能係因為2020，亦係一個時代，我哋經歷咁多，過去一年，It’s a good time，未來會經歷啲乜，我哋都唔知道。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|