情侶之間情趣嘅事真係唔係人人明，好似吳若希就成日都會喺社交平台「公審」自己老公，有人睇落會覺得係兩公婆放閃光彈，但亦都有人覺得佢兩個真係不和。噚日係中國情人節七夕，吳若希再次喺IG發功，上載二人背對背嘅照片，相中佢老公拎住手提電話，而吳若希就用手指扮手槍，配上文字：「七夕夜，最真實構圖。何生跟他的電話恩愛了一整晚，我跟我肚子搏鬥了一整晚。然後我默默地在手機search『離婚方法』，看完發現過程要那麼繁複，那還是算了。」之後更加上Hashtag「叫你手機幫你生兒子」。
事緣係因為吳若希老公近日沉迷一款近期hit爆、名為「灌籃高手」的電話遊戲，搞到忽略咗正大肚嘅吳若希，於是佢就嬲嬲豬公審老公，仲直接踩呢個game係「垃圾遊戲」。網民對吳若希同老公呢種「耍花槍」方式似乎已經睇到厭，紛紛留言話：「睇你日日數臭老公，日日都諗緊點樣離。睇唔出你和老公有幾愛對方，只係感覺因為你有咗先結婚，而家連垃圾game都吸引過你，你仲唔檢討一下，可能你老公日日諗你幾時正式提出離婚，佢都忍夠你。」亦有網民提出可以幫吳若希搞離婚：「嫌麻煩？如果有律師可以幫你離婚，只需要你簽名，唔會成日煩到你，咁你就會離？」向來寸嘴嘅吳若希當然不甘示弱，佢留言回答：「無錢請律師，可唔可以贊助我？」而該網民見到吳若希咁講，即大方留言話：「當然可以啦，全數幫你俾埋都得，係咪真係想離先？係嘅就PM傾。」不過吳若希就冇再回該網民。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
