47歲的范振鋒電台DJ出身，1994年入行，撈勻歌影視，在娛樂圈工作了26年，當中有10年時間簽約無綫，他為大台主持過的節目，印象最深只有《夜宵磨》和《兄弟幫》。擅長主持飲食節目的阿范有段時間狂開餐廳，最風光時擁有火鍋、日本餐廳、雞煲、茶餐廳，甚至大眾化的日式放題等6間不同類型食肆，不過幾年間先後執笠。
阿范現在樂得無生意一身輕，他慨嘆老闆唔易做，「我哋小股東啫，又唔係咩成功生意，唔會覺得風光，反而覺得好辛苦，辛酸唔係做嘢辛苦，而係人哋以為你好風光，有苦自己知。飲食業好難賺錢，要兼顧好多嘢，有時仲要貼錢蝕錢，壓力好大，除咗頂住間店跑數，又要睇住班廚，員工嗌交又要調停，一間舖仔好多嘢。」
阿范自爆餐廳有洗碗姐姐離職，員工做到踢腳，他主動幫手洗碗洗廁所。近日政務司司長張建宗勸勉年輕人搵工「不要太揀擇」，應放低身段，洗碗都是工作經驗，阿范笑言一早試過：「洗碗唔容易，員工見我洗得慢，嫌我阻手阻腳就叫我出返去。做餐廳，老闆肯落手落腳，同員工感情都好啲。」阿范指餐廳先後執笠各有不同死因，當中有賺有蝕，算是拉勻打和離場。那幾年賺得寶貴經驗，他坦言愛搞餐飲業，不排除將來會東山再起。「而家都仲好多人搵我一齊搞，呢次疫情好多食肆做唔住，好多餐廳免頂手費，又話減租，只要你肯轉份約，肯上身就得。」阿范強調現階段不敢再冒險。
沒搞副業的阿范，樂得專注演藝工作，幕前幕後兩邊走。他8月底約滿無綫後便決定不再被「一騷制」束縛，阿范這幾年在大台只是主持《兄弟幫》，該節目年初摺埋後，他便被投閒置散，「年初接通知《兄弟幫》要摺埋，好多台前幕後同時要離職，嗰刻我心情有啲沉重，一直都等公司有新嘢畀我試，一路等咗7、8個月冇嘢做，我有主動問，公司坦言冇安排。」阿范不想浪費時間，約滿離開也沒有不捨。他這幾年都簽「一騷制」：「多少騷唔係好緊要，我簽約都唔係多騷。我騷錢唔多，4位數字，唔值錢，早幾年試過有4、5個節目出街，嗰年有300幾個騷，第二年俾人發現爆騷又即刻少番嘢做。」阿范全靠人脈好，外面有其他演藝工作，不至於在大台等運到，「如果只係得佢一瓣，我會擔心同徬徨、手震因為我出面唔停有嘢做，我要自由，所以每次叫我去續約，一騷或六騷都冇所謂，合埋對眼，唔使5秒就簽。」
阿范即使在大台拍劇，也只限於做「串星」，「拍劇要幾個月，lock期就要停晒出面啲job，收入會減少，我唔想為拍劇推job，自問係未知之數，我唔後生，仲去博咩！」阿范在大台期間也未獲安排做大騷司儀，最多只是10年前會考放榜前夕做商場打氣騷，論條件他其實並不輸蝕，「呢行好條件大有人在，好多又高大又後生，英文又叻。」大台向來只捧親生仔女，阿范體諒：「好正常，我做娛樂公司有簽藝人，在商言商，我用錢簽佢，包薪、月薪都好，梗係要用多啲自己人追番條數。」
過去8個月疫情，娛樂圈一片死寂，阿范和老婆李思欣以往最大收入是夫妻檔出埠登台賺騷錢，疫情下禁聚乜都叫停，他們收入大減，阿范說：「我未算最慘，感恩仲有電台工作，娛樂公司繼續運作，收入少咗，呢半年變咗冇得儲錢。我哋都好貼地，街邊篤串魚蛋、食個碗仔翅都開心。」夫妻共渡時艱，身邊的思欣也說：「我哋應使則使，搵多啲時就去吓旅行，而家係正常開支。」
阿范和思欣轉眼結婚9年，他們婚後即過着「三人世界」，孝順的阿范跟外母同住，兩公婆既未置業，也未生育，近年看着樓價飆升，他們都後悔沒及早「上車」，思欣無奈：「結婚初期，有諗過買樓，當時覺得貴，想睇定啲，點知越睇越貴，我唔想孭住層樓，老公有壓力，租樓住都OK，拖吓拖吓變咗維持原狀。」身邊友人都升呢父母，他們都曾心思思想生小孩，恨做老竇的阿范看到這兩年間香港轉變卻又改變主意，「呢一、兩年令人好擔心，經濟好差，要生都要為子女鋪好路，都係等經濟能力再好少少先。」他們最新共識訂下3年生仔期限，思欣或考慮雪卵。阿范算是圈中愛妻號，他也緊張思欣的演藝發展，問到他們夫妻檔騷錢五五分賬嗎？阿范衝口而出：「有時騷錢多，我會『𠝹 』多啲畀老婆。」思欣妙答：「佢擔起成頭家，做騷講嘢都多啲，佢多啲啦，等佢隨意打賞！」
撰文：比華利
攝影：陳慧安
攝錄：廖達燊
場地：金玡居
髮型：O.H hair Salon
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|