現年71歲的石修(原名:陳碩修)，人如其名，幾十年保持健碩，修身嘅靚佬身型，絕對不遜於任何一位「小鮮肉」，訪問當日，更有路過影迷要求與修哥合照，可見他的魅力依然沒法擋。
不過想不到修哥年青時，曾受腸胃怪病折磨3年，胃近乎失去消化功能，試過一個月體重急跌45磅，由150磅跌至105磅，身體虛弱，甚至乎吃一條菜，也會原條排出，睇過不少醫生，吃過不少藥，亦無法醫治。他決定放棄尋醫吃藥之際，經鄭少秋介紹，認識一位氣功師傅，抱著即管一試的心態，跟隨對方學習3個月太極後，怪病竟不藥而愈，修哥憶述當年患病的感受，他說：「我後生時個胃嘅消化能力唔好，結果病咗幾年，當時有心無力，任何事都唔夠力去做，覺得好可惜，當時先清楚知道健康係咁重要。」
- 71歲的石修，身型絕不遜於任何一位「小鮮肉」。
- 為了有不一樣的造型，石修刻意增磅演出，從面型已經明顯看出「成果」。
為《反》劇增肥8磅
04年在大台劇《隔世追凶》中飾演「賀正南」的修哥，奸到出汁令人印象深刻，今次在《反黑路人甲》演出，身型忽然脹了一個碼，原來是他刻意安排：「我最肥嘅時候160幾磅，其實我保持喺150-155磅之間，已經保持咗20年，最肥差不多去到165磅，點解會咁呢？其實我係刻意去咁做，因為我拍《反黑路人甲》時，想自己個樣有小小變，唔想每套戲都係呢個身型，不如變肥小小，所以刻意增咗8磅」。雖然增肥後，外界對修哥的評價相當不錯，不過拍罷《反黑路人甲》後，即時進行修身，工作以外他不讓自己多半點肥肉。「我做演員，係睇個角色需要，有時可以增好重磅，有時就要瘦啲，不過應該要keep返平時嘅體重。」修哥說。
- 年青時曾被腸胃病纏繞，石修多年來也注重身體健康，近年以步行及套路養生。
減磅首要注重飲食
增磅容易減磅難，尤其對於上了年紀的人來說，新陳代謝減慢，隨時更會事倍功半，不過修哥就有他的一套心得：「年紀慢慢大，當然新陳代謝會慢，荷爾蒙活力亦會慢，我都鍾意食嘢，其實大家都鍾意食香口、重口味嘅嘢，我都唔例外，不過依家大家都講飲食衛生，要小心飲食，有啲食物我會避開，提醒自己一啲含有防腐劑、煎炸同多油，以及多鹽、多糖等食物，就少食啲，對身體比較好。」除了注重飲食，愛好運動的修哥，因為年紀關係，運動也要「轉型」：「要搵一啲適合自己年紀嘅運動，依家我多數都係急步行，10年前我仲係跑，可以keep fit同練氣，又能夠保持身體狀態，但係跑得多，忽略保護令膝頭哥受傷。」修哥指由現時由跑步改做急步行，同樣可以保持健康：「要行到接近起跑之前嘅速度，行到出晒汗先算係運動。」
冇膽量做「壞咗嘅男人」
近年，娛樂圈不時出現「壞咗嘅男人」，多年來與不少花旦拍檔的修哥，數十年來也是零緋聞，如何可做到這份「修為」？「我比較關心及注重家庭生活，知道自己唔能夠，亦都無咁嘅條件、膽量去做一啲『其他野』，我亦鍾意屋企同愛錫屋企，每做一樣嘢都屋企行先，我之前拍好多呢類（感情）戲，但係我會諗，有啲嘢係唔做得嘅就唔做。」8歲做童星入行，修哥縱橫片場超過半個世紀，自然深明這行的遊戲規則。他又說：「我拍咁多年戲，好多都係愛情戲，亦都遇上好多異性對手，不過只限係戲裡面，如果太避忌，好多嘢都做唔到，我喺戲裡面會放鬆，投入個角色，不過完咗之後就會完。」所以奉勸其他男女藝人，偷食唔好再用：「抽離唔到角色」做越軌理由。- 與太太相戀逾50載，依然手拖手行街。
19歲邂逅太太相戀半世紀
當年19歲的石修，認識比他細5歲的太太黃茹麗，二人拍拖10年後結婚，多年來會否因修哥的戲而醋意大發？「佢知我做邊一行，因為做呢行無得話淨係做邊一類戲，唔做邊一類戲，或者只可以同邊個對手做戲，對我唔公平 ，亦都對我個行業唔公平，佢同我一齊已經接受咗呢一樣野，佢亦都好明白，我從來無聽過佢講唔可以點樣點樣，做戲就係做戲，工作就係工作。」修哥說。修哥夫婦的相處之道，令二人相戀超過半世紀，還不時看到二人手拖手逛街，這份細水長流嘅愛情，絕對值得學習。
----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
