38歲的譚凱琪Zoie ，今年3 月，下嫁拍拖8年的餐廳少東莊日宇。婚後四個月，再宣布雙喜臨門，而家已經佗B 7個月喇！因為疫情關係，大肚婆為安全起見，一早已經停工。今年2月，Zoie 突然辭演新劇《BB大晒》，當時已傳她造人成功。最近，Zoie有份參演的劇集《過街英雄》播映，她亦一律缺席所有宣傳活動，寧願留在家中專心養胎。
趁住第三波疫情稍為緩和，日前Zoie在老公監管之下，終於可以行街shopping，她向《壹》仔表示：「有啲正經野要辦，其實都冇出街好耐啦，冇出街兩個月。」冇見一排，Zoie已經明顯見肚。入行多年，她一直以童顏及瘦底身材取勝，所以就算佗住BB，一樣唔畀自己走樣。兩個月後便是預產期，她的手腳依然纖幼，童顏面亦冇腫脹。食呢行飯，真係要得天獨厚！
- 禁足兩個月，日前Zoie終於可以出街唞下氣。
- 佗B 7 個肚，Zoie身材依然冇走樣，手腳keep住纖幼，肥肚唔肥人！
誤以為中武肺
今年3月，Zoie低調完婚之後，更連升兩級，人妻兼且係準媽咪。佗B撞正疫情，搞到Zoie都變得緊張，在懷孕初期，更試過以為自己中招，去做深喉測試，後來先知原來只是懷孕初期的徴狀，虚驚一場！不過，在非常時期，大肚婆當然要加倍小心！自第三波疫情爆發，Zoie已經禁足兩個月，日前终於可以在老公的視線範圍內出街shopping 。她說：「咁我都會等佢得閒，先至會安排出去。」
有老公貼身侍候，Zoie走入平民時裝店左揀右揀。大住肚的她依然好貪靚，拎住條deep V連身裙愛不釋手。當日Zoie身穿白色運動外套，明顯已經見肚。但身形就同好姊妹陳凱琳做孕婦時一樣，都係「肥肚唔肥人」！
- 老公全程傍實，Zoie 主要睇連身裙，大住肚一樣貪靚。
隨時淡出幕前
疫情期間做大肚婆，真係唔容易！Zoie表示除了擔心之外，連產前檢查都要押後。她說：「都會擔心㗎!延後咗囉！不過，好啲嗰陣都會去檢查返，因為始終都緊要嘛！」38歲佗第一胎，Zoie都算是高齡產婦，在佗B初期，Zoie曾經出現妊娠不適，呼吸困難，更試過出現情緒不穩定，但現在已開始適應，情況亦穩定下來。她表示：「都開始習慣，冇話好緊張嘅，一切都正常啦，個心態保持開朗。」Zoie曾經表示老公好鍾意小朋友，希望可以生夠五個。至於生完BB之後，會唔會繼續拍劇，她就有保留地說是未知之數。咁講法，即係隨時又有一個靚媽，可能會淡出幕前
住豪宅收股份
入行足足20年，當年同陳敏之一樣，是小室哲哉的徒弟，唱歌事業發展麻麻。13年由有缐轉簽大台，開始拍劇。16年，憑住一套《EU 超時任務》色誘戴耀明，令對方興奮「動L」，被高登巴打封為「動L女神」，事業開始有起色。成功入屋，Zoie近年拍劇拍到冇停手。事業捱出頭，又成功埋岸做闊太，老公莊日宇是多間餐廳老闆，而且出手闊綽。4年前，原本家住比華利山的他，再以1500萬買入九龍塘低密度帝景峰單位，俾Zoie做豪宅女主人。早年亦有指莊日宇開設的餐廳，將部份股份轉到Zoie名下。穩袋長期飯票，而家更佗住金叵羅，難怪Zoie可以疊埋心水做少奶奶
----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|