劇組精心炮製「驚」喜派對 朱茵49歲生日獲老公隔空送歌賀壽
前日（25日）是「童顏仙子」朱茵的49歲生日，正為電影《雨打芭蕉》長駐內地開工的她，雖然跟老公黃貫中（Paul）和愛女黃鶯分隔兩地，但有心思的Paul早於凌晨已「遙距送禮」，她說：「囡囡同老公向來都好重視我生日，噚晚我收夜，收工已經到咗生日，不過因為網絡問題，接唔到老公電話，令佢好焦急咁搵我，最後佢唱咗生日歌畀我聽，今日亦都唱咗，所以我帶住愉快嘅心情開工。其實喺工作中度過生日係一個好兆頭，寓意全年富足圓滿。」
除此之外，朱茵更獲劇組精心炮製「驚」喜派對，「成組人叫我入房，好嚴肅咁同我講，今日嘅戲要重拍，我心諗：『唔好啦，就快煞科喇，唔想浪費大家嘅心血。』但係佢哋講得好有說服力，我又覺得係喎，啲光好似唔連戲，最後佢哋仲差啲發火！點知工作人員突然播咗段片，內容係《雨打芭蕉》嘅劇照、我喺片場嘅快樂片段，令我好感動。」與劇組朝夕相對近一個月，感性的她直呼不捨，「雖然仲有幾日先煞科，但我已經好唔捨得呢班好努力，而且熱愛電影嘅年青人，佢哋係我身邊嘅小天使。」
提到今年的生日願望，朱茵祝願電影《雨打芭蕉》取得佳績，還表示外柔內剛的「吳霜」一角，是她的轉型之作：「我好期待呢部電影，因為同我以往接拍嘅角色好唔同，呢部戲可以話係轉型作！《雨打芭蕉》係一部好貼地嘅藝術電影，將好多現況透過電影話畀大家聽，希望入場嘅觀眾朋友會感同身受。」
來源 source: http://hd.stheadline.com
|
鍾意就快D Share啦！
|
|
|