27歲的阿Sam，究竟是恐怖情人？還是癡心情長劍？
他是狂野港姐廖慧儀的前度，被網民封「戇X」的癡情Sam，日前首度現身接受《蘋果》訪問，「我叫阿Sam，今年27歲，讀體育畢業，之前做過空中服務員同紀律部隊。」身高近6呎、大隻健碩、五官端正，理論上應該可以孔雀開屏，事實上卻對前度未忘情。
因為點名叫大台23歲「小鮮肉」孔德賢不要找自己的女友，自此跟廖慧儀關係惡化，早前更被狠飛斬斷年半情，網民都替他慘慘豬，廖慧儀絕地反擊，指控阿Sam跟蹤、恐嚇、性騷擾。雖然感情是兩個人的事，但男女主角都將它放上網公審，網民普遍同情疑被戴綠帽的阿Sam，「唔抵得你咁戇X，仲要俾人怒插，喺佢哋角度癡情係犯法。」
拍拖1年半，分手20多日，阿Sam仍難忘舊情，「我哋喺交友程式上識，覺得大家性格好夾，相處好開心，好短時間就一齊咗，嗰時我出班（懲教署畢業），佢都有嚟送禮物同我影相。」上年3月開始拍拖，兩人一直好甜蜜，他更支持廖慧儀選港姐，「佢要參選，我係好支持，因為嗰時社會運動加埋肺炎，佢有段時間冇得飛比較空閒，我知佢一直有入演藝圈嘅夢想，佢想成為藝員，我叫佢試吓，佢有呢個能力同潛質。」
然而，廖慧儀落選後簽大台，一切都變了，當日Sam曾在網上控訴：「係咪因為入咗娛樂圈，擴闊咗眼界，回頭看所有嘢覺得我甚麼都不是？」今日他卻轉晒口風，將問題攬上身，「同居生活積落小問題，回頭睇番可能係我責任，日對夜對感情可能淡咗，同屋共住多拗撬，感情有磨擦。可能我有啲奉旨，覺得佢唔會離開我，好容易將自己情緒發洩佢身上。」
對於曾開名警告孔德賢勿再找自己女友，今日Sam亦否認懷疑對方撬牆腳，「第三者就唔關事，佢兩個係好朋友。」更強調相信廖慧儀冇出軌，「冇冇冇，同佢一齊咁耐，信佢人格。」至於兩人分手原因，是廖慧儀覺得他處事唔夠成熟，Sam被狠飛後想復合，卻被指控跟蹤、恐嚇、性騷擾，「呢啲全部否認，事情有誇大之嫌，當你好緊張一個人，佢全日唔聽你電話，係咁cut你線，嗰時真係好想搵到佢，不停打畀佢，想挽回關係同佢對話。（性騷擾）呢樣唔係真，分手後有一兩日復合番，當時我用番以前一齊時甜言蜜語同佢傾偈，可能喺佢眼中係性騷擾，我冇講乜過份說話，只係好掛住你、好想攬你、好想錫到你呢啲說話。」
分手至今差不多1個月，Sam依然情傷未癒，「不斷回憶同佢以前，一定諗佢幾好，就算分手佢點對我都好小事，我會原諒佢。因為愛得太深，太習慣有佢陪伴，短時間內我覺得失去精神伴侶，好似心裏面冇咗一忽肉，要時間適應。呢排情緒波動比較大，好在有朋友幫助，自己keep住做運動同打波，好少少。」
27歲的他，人生目標是可以安居樂業，30歲前結婚生仔，這亦是他跟廖慧儀情已逝前的共同計劃。今次分手事件弄至全港都知，他感慨：「學識咗要尊重對方意見同決定，情緒管理都係好重要一課，處事要成熟冷靜少少。」面對鏡頭，他沒再數臭前度，「我唔會話佢嘅，我覺得佢好好，佢對呢段感情全情投入，好認真付出，最後搞成咁冇人想，希望佢發展順利同開心。」
最後，問他有甚麼想對廖慧儀說？他說：「講聲對唔住！我都同佢講好多次。」
撰文：余燕儀
攝影：陳慧安
攝錄：葉君海
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|