現年58歲的曾偉權今年2月傳出罹患肺癌，昨日有消息指他病情惡化，大前日被送入將軍澳醫院，昨晨危在旦夕。今日《蘋果》再致電照顧曾偉權的契妹Sasa，但一直未有接聽電話，監製梅小青今日回覆表示仍未聯絡得上Sasa，直言好擔心。
曾偉權患病後，斷絕親友聯絡，月前更選擇與無綫終止合約，暫停所有工作，專心休養。曾偉權曾在訪問中表示「鍾意狗多過人」，他一直有做動物義工，多次出動為慘死街頭的流浪貓狗，執拾屍體及火化，默默送牠們最後一程。
早前曾偉權擔任寵物領養宣傳大使，帶同兩隻愛犬小吉和小甘一齊為漁農自然護理署（漁護處）拍攝宣傳片，並於今年9月上載到YouTube。當時的曾偉權明顯消瘦，訪問時聲音亦略帶沙聲，但精神不俗，網民估計是去年底拍攝，《蘋果》亦有向漁護處查詢，但暫未獲回覆。片段中，曾偉權與兩隻愛犬有好多互動，拖着牠們行入草叢，又錫錫愛犬，但幸福背後，曾偉權坦言唐狗一直好少人領養，直言：「小吉小甘好驚青，行雷閃電會周圍走，如我唔領養佢哋，應該冇人領養，因為養佢哋好麻煩，有時會周圍抓嘢周圍搞，會失控，要畀多啲時間，漸漸呢幾年好啲，畀個地方佢覺得有信心就OK。」
一般人領養寵物都會以外形行先，但曾偉權就本着一個心「冇人養就我養」，漸漸發現唐狗有好多好處，他說：「唐狗嘅樣的而且確係惡，但其實佢哋心中都係有溫柔一面。佢哋視你為主人後，就會完全將個心交畀你，好多一啲名種狗就係人都抱得，但唐狗就唔會，認咗你係主人之後先會畀你抱，呢個係佢哋嘅特性。而且唐狗嘅身體健康比較好，簡單啲講係冇咁多病痛，同其他狗唔同，所以唐狗有好多好處，佢哋性格比較好啲，同人相處好直接同和藹，所以畀啲時間同佢哋建立關係，耐咗會鍾意唐狗多過其他狗。」
曾偉權透露養了3、40年狗狗，每次面對狗狗離世都會很傷心，但要學懂放手，「呢個係人生必經階段，好多嘢控制唔到，相反我哋人，只要喺度時對佢哋好，畀多啲時間陪佢哋，當一切做咗之後，佢要走都冇辦法，你要懂得去放手，大家應該將愛承傳落去。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|