愛妻好鍾意陳百強先會揀《深愛著你》。
前無綫娛樂新聞台主播林子博的妻子董燕君上月不敵癌魔辭世，今日於紅磡萬國殯儀館設靈，靈堂布置簡潔，不少圈中人包括汪明荃、薛家燕、古天樂、王祖藍、陳展鵬及TVB娛樂新聞台等均有送上花牌，黎瑞恩、林盛斌及李日朗等到場致哀。
林子博受訪時透露現場以佛教儀式進行，並一直播放陳百強的歌曲《深愛著你》，他解釋：「係太太意願，因為佢好鍾意陳百強，唔知佢想播定係想我唱，我記得佢話我唱得好難聽，所以決定播，（佢有咩遺願？）佢想睇住仔女長大，依家由我繼續。（小朋友心情點？）小朋友好快冇事，佢哋好生性，姐姐仲同細佬講今日唔好鬧交，我就未平復，成日喺屋企會觸景傷情，所以考慮會搬屋，同埋希望用工作去忘記。」他又指古天樂及汪明荃都十分有心，有致電慰問他。問到經濟狀況？他坦言：「錢財身外物，暫時ok，照顧好小朋友先，仔女係太太畀我最大禮物。」說時一度眼濕濕。
江美儀受訪時表示跟子博相識多年：「睇住佢同太太拍拖、結婚同埋小朋友滿月。（有冇安慰佢？）盡在不言中，佢今日情緒起伏都大，真係好可惜，太太咁後生走咗，小朋友咁細就冇媽咪，不過我見小朋友情緒OK。（有冇同子博講啲鼓勵說話？）之前講咗好多，佢今日都好忙，有好多朋友到場，所以都唔好打擾佢。（知道知道佢嘅經濟狀況點？）冇直接問佢，但見佢有工開，肯做唔會餓死，佢之前集中喺太太度，依家會放喺小朋友身上。」
來源 source: http://hk.on.cc
|
鍾意就快D Share啦！
|
|
|