2020年11月14日星期六

【頭條獨家】疫情下唔使頭痕搵工實習涂毓麟疊埋心水專心做歌手

疫情下唔使頭痕搵工實習涂毓麟疊埋心水專心做歌手

涂毓麟疫情下疊埋心水專心做歌手，唔使煩搵工作。

「公子」涂毓麟（Oscar）出道一年出咗4首單曲，除咗處男作《二人一世界》外，再有《Never Mind》、《日出彩虹》及《視像見》。讀緊科大環球商業系YEAR 3嘅Oscar，喺疫情下做歌手反而覺得係入咗避風塘：「𠵱家我認定要唱歌，全神貫注唱歌寫歌先，唔使好似同學咁，搵緊求職機會，好徬徨。」採訪：方騫平

月前涂毓麟出完新歌《日出彩虹》，好快緊接再出《視像見》，歌詞係緊貼疫情下，大家面對嘅問題：「呢首歌對我嚟講好特別，係我跟大學同科朋友一齊創作，亦係公司選用我嘅第一首歌曲，因為係自己作曲，錄音過程好順利，只係用咗6個鐘頭就起貨喇。」

他有份作曲嘅《視像見》搵埋氣質女神蘇皓兒(Chloe)同埋《全民造星II》冠軍吳啟洋（Phoebus）拍MV。

提到出歌期間，MIRROR成員盧瀚霆（Anson Lo）、江𤒹生（Anson Kong）、柳應廷（Jer）及姜濤齊出新歌，Oscar唔覺被夾擊，「大家有唔同風格，冇問題嘅，呢個市場需要唔同元素，每人鍾意嘅嘢都唔同，所以唔構成『攬炒』，好似我首歌《視像見》咁好貼地，講緊𠵱家發生緊嘅事，同佢哋嘅愛情歌唔同，而且一年得嗰365日，香港有咁多個男歌手，唔通個個都避開晒咩？就算同公司都會有相撞啦，我覺得愈多人出歌愈好，可能中間有啲時間冇人出歌，我反而覺得好空虛。」目前Oscar疊埋心水做創作歌手：「好多同學都搵緊工，但疫情關係，實習、搵工機會少咗好多，過去我都做過幾份實習工作，𠵱家競爭真係大咗，好彩我認定咗唱歌，讀書以外會集中火力去做，唔想半桶水。」