達明一派今晚在灣仔新伊館舉行《REPLAY 神經/意難平》演唱會，明哥在開場唱完講述「再見中環」的《情流夜中環》後忍不住落淚。達明一直以來創作了不少諷刺社會時弊歌曲，明哥亦有藉着歌曲呼籲香港人繼續發聲、天安門事件、以及立法會發生的事，不過講到最博的，相信是他冒着被拉的危險，唱出歌詞內有多位政界人名的歌曲《排名不分前後左右忠奸》。
當達明唱到1989年推出的大碟《意難平》中收錄的《四季交易會》時，他們指當年錄完碟是5月，之後在新聞中看到天安門事件，學生聚集、遊行，心中第一個反應是「呢個地方有機會，但之後越來越危險」，唱完後明哥話：「估唔到呢首歌聽番仍然有感覺，睇番我哋立法會，係咪好似交易會？」
唱到描述患上愛滋病的人受他人歧視，活在驚恐中的《愛在瘟疫蔓延時》，明哥就引用歌詞話：「大家唔好驚，鎮定啲，大家經歷咁多，學咗唔少武功！」而《忘記他是她》時，明哥則說：「就算鍾意乜性別嘅人，其實呢個世界中仍忽略有啲人，就係跨性別人士、佢哋係少數中再少數、一個人用乜氣質代表自己，大家都應該尊重。」之後兩人便換上全身以一塊塊膠片造成，看似是「連儂牆」的白衫白褲白帽出場唱《諸神的黃昏》。
到唱完《天問》後，明哥表示幾日前周耀輝老師曾在fb出了一個關於《天問》的post，又謂最少在這幾個晚上可以問不能問上天的問題：「唔可以停、質問不公平嘅事，喺咁嘅社會氣氛下，呢啲歌可以唱幾耐，今日佢哋可以話立法會議會議員唔愛國，將來香港人唔知使唔使審查愛唔愛國？我哋有冇自由選擇愛乜？以下呢首歌我哋有諗過cut唔cut，唱完會否俾人拉？我哋唔好怕，怕就輸一世，一路一路退後，習慣咗呢個方式、有乜就唱！」講完全場觀眾歡呼拍手，之後劉以達便唱出歌詞內有政界人名的歌曲《排名不分前後左右忠奸》。
唱到《你情我願》時，由於原裝歌曲最後是混入英國國歌，唱完明哥就指這首歌「好笑也好苦」：「有英國國歌喺入面，如果而家加中國國歌大家可能比人拉。」此時有觀眾笑，而明哥即提醒大家：「你哋笑都可能俾人拉！1990年英國考慮畀居英權我哋，搞到而家先畀，歌背後係話好諷刺，養母唔理我哋，生母唔知想點對我哋，大家而家有啲想走、有啲又走唔到，我哋可以唔使走，因為呢個係我哋地方，而家聽番再有感覺，以前殖民對我哋唔係幾好，但生母當我哋係殖民，好悲涼。」到唱《愛彌留》前，明哥講到副歌部份，是要將夢想變成行動，而唱到該部份時，明哥又再忍不住喊起來，觀眾即時大叫「我哋支持你」，但之後明哥再唱到副歌時再一次喊的他，要擰轉身抹眼淚。
Encore時，全場熄燈，觀眾將電話的燈亮起，大叫「香港人加油！」兩人其後換上黑色T恤、牛仔褲出場，劉以達係長髮配辮仔造型現身。當唱《恐怖分子》前，明哥指這個世界越來越荒謬、扭曲，大家要繼續努力令它不要變得更壞，又提到這首歌曾在廣州舉行演唱會時唱過，之後他說：「我好掛住上面嘅朋友，無耐日子係咁……我好愛國，你唔好冤枉我，愛國先會寫呢啲、唱呢啲歌，民建聯嘅人會唔會唱呢啲歌？係愛先會唱……廣州時仲唱到呢首歌，我以為世界還好，但情況急轉直下。」之後明哥唱出寫給世界不同地方的戰友、手足的新歌《今天世上所有地方》。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|