武漢肺炎有迹象在香港爆發第4波疫情，無得旅行，就連去最近的澳門都不能，想跟「侯賽因」出公海玩兩手都難，Eric Kwok（郭偉亮）與谷德昭、劉浩龍近日在YouTube開設新頻道《Round Table Poker》，每集找來老友玩德州撲克，每次輸了便要被大懲罰，節目將會逢星期一、四推出。昨日Eric Kwok接受訪問時表示，跟朋友玩德州撲克多年，疫情下大家在香港就聯想一起玩，因為他們玩牌期間會傾無聊事，覺得很有趣，為求效果到時每集主力邀請女嘉賓，輸家要食個人不喜歡的食物。拍攝時用了360度鏡頭，到時眾人牌品一目了然。
宣傳片中，Eric Kwok食到嘔，太太葉佩雯（Grace）則拿着豬脷、而周秀娜亦吃得痛苦，他說：「我食榴槤真係會嘔、有次輸我要食納豆都嘔，Grace嗰集冇食晒條豬脷，佢咬幾啖，形式上核突，但佢反而食落話好味。」周秀娜是對德州撲克一竅不通，最終被罰，Eric Kwok指她最怕吃榴槤同blue cheese：「最後我哋畀blue cheese同狗罐頭濕糧畀佢揀，到時你哋就知佢揀咗乜。」
這個遊戲可看到朋友各種性格特徵，劉浩龍與谷德昭較穩重，Eric Kwok自言通常沒有人相信自己：「我哋咁誠實嘅人要發洩吓，唔可以成日講真話，有時輸都係為咗效果。谷德昭最遲學，佢之前玩咗一年先贏咗一鋪，而家玩得唔錯有計謀，會深思熟慮，未必估到佢牌路，反而師兄估到。但最震撼係我太太，佢平時都幾誠實唔講大話，竟然對住我講大話。」但賭枱上兩公婆不會禮讓，見到片段中Grace話：「你唔係驚呀嘛？你死梗，你實死梗呀！」Eric Kwok說：「佢嗰集好好笑，好少見我哋喺枱上廝殺，我哋有幾恩愛、邊個係一家之主？完全冇面畀！我唔驚佢㗎！但佢識睇我幾時講大話，知道幾時有異樣。」
而眾人中他覺得何超儀最好運氣，直達賭神級數，谷德昭笑言：「能夠同姓何嘅後人喺賭枱上面一較高下，我會全力以赴。」而Eric Kwok亦覺得她在眾朋友中，技術未必是最好，但手持爛牌也可以贏：「佢如果講運氣，絕對係有賭神嘅運，以前最初玩喺佢哋屋企，佢同陳子聰都冇耐性，玩一陣就走開。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|