ViuTV劇集《暖男爸爸》曲終人散，劇中故事的確暖化了不少觀眾心靈，但對於有份演出的強尼和陳俞希（Hailey），更加有另一番感受。強尼以往在有線講波，再涉足綜藝節目，過檔ViuTV之後更要演劇集，瓣數多多。周身刀的強尼更成為ViuTV版「羅樂林」，雖然未至於一日死5次，但就霸佔3個黃金時段節目，除了《暖男爸爸》，亦要主持《全民造星III》和《晚吹－有酒今晩吹》，有網民更笑稱他由ViuTV陳啟泰，升呢做「全尼」。
日前兩人在九龍灣接受《蘋果》專訪，訪問期間經常劇不離口，雖然身為劇集一分子，落力宣傳好理所當然，但從言談間能感受到兩人真心對劇集充滿愛，強尼說：「你問我係咪好愛呢套劇？係，我係好愛，但係我都好愛其他嘅工作，包括《全民造星》。我覺得呢個台係漸漸地俾觀眾接受，包括啲節目、藝員，同埋我哋表達畀大家嘅方式，喺我哋不停試嘅時候，感覺到越嚟越多人接受。我哋唔會有一個舊有嘅模式去做畀大家去睇，只係不停去試畀你睇，試到你去鍾意，試到好嘅時候，梗係想好好保護佢。」
強尼在《暖男爸爸》爆出，對觀眾來說算是意外，連強尼自己都沒想像過會拍劇：「我入咗行10幾年，由體育主持做起，day one開始冇諗過會拍戲，只係一路做一路發掘，一直都係搵緊觀眾，搵緊外面鍾意我嘅嘢。」
多數觀眾對強尼認識少，但10年來累積起的觀眾緣不淺，有人翻出昔日他主持體育節目的片段，其中一條跳舞片，舞技比阿舜跳《娃娃看天下》還要厲害，強尼訪問中都要多謝這次演出：「呢條片係我人生嘅轉捩點，我諗呢個節目係由體育開始步向綜藝嘅第一步。因為喺我做收費電視嘅體育台，嗰陣係好專責做體育，個心唔會諗其他嘢，好似代表公司出席百萬行，公司嘅PR形容我哋係artist，我哋都會抗拒，大家覺得只係講波，做體育，唔係artist，唔係覺得唔專業，只係唔配呢個名份。」他續說：「之後公司話搵幾個同事，除咗簡簡單單講波之外，扮吓嘢去講吓啲預測賽果，做到好似足球雜誌式節目，真係好斗膽，不過諗深一層又真係冇所謂，大家都係玩，做完之後，娛樂台搵咗我做《空間大改造》，之後開始咗做綜藝。」
ViuTV開台4年半，骨幹藝員少變化，藝人曝光率高看似無壞，但太密集式出現又怕會令人討厭，強尼自問知道外間睇法「點解成日睇嚟睇去都係呢班人？」，他有感而發地深知公司短處：「我覺得觀眾都要好公道地去睇，我哋個台暫時唔係好似其他台，喺過去嗰4、5年，綜藝同talk show都係我哋，都係同時間用緊呢班人，好難得可以有機會拍劇集，可能執到一個角色返嚟，大家都會好努力去做，事實大家都唔知道下一次係幾時，又或者唔知會唔會再有呢啲機會。」強尼自覺幸運，比起公司其他同事多戲份，但每個人付出的努力並不只是交功課：「好似阿妹（岑樂怡），佢食三文治嗰場戲，練咗一個禮拜。大家都好努力，因為我哋知道，好難得可以參與呢套劇。」
同樣位列ViuTV元老的Hailey，過去幾年目睹公司轉變，都有另一番感受：「我喺now轉過嚟，嗰陣搵咗Eason（陳奕迅）做開台嘉賓，佢話希望可以畀大家多一個選擇，我覺得即係多個台畀大家揀。經歷咗4、5年之後，而家去睇返，發覺唔係話多個台畀人揀，而係多咗啲類型畀大家揀。近幾年有Netflix、韓劇呢啲選擇，但係今次可以令觀眾坐低去睇電視，而且仲係香港嘅劇集，真係好開心嘅一件事。」
兩位元老背景有點相似，同樣由收費台過檔，再成為公司一哥一姐，Hailey一度講到哽咽：「諗返有次強尼生日，送咗支酒畀佢，仲寫住大家要一齊努力，到咗劇集出咗街，好開心有呢個角色，對手多接觸，feel到一齊努力，梗係希望可以多啲人留意。」強尼坦言明白Hailey的感受：「作為演員同藝人，呢個都係我哋嘅選擇，當然你可以話第二個台從來都冇話需要你，係，但係我覺得喺得呢個台發展，係我嘅選擇，我鍾意佢嘅嘢，願意用我嘅時間喺呢度發展。你話喺過程中，會唔會有啲失落？我冇，因為我知道呢個模式係新，如果想用過去做電視嘅藝人嘅方程式去搵，我唔會喺ViuTV呢個台搵喇，佢唔係一個好成熟嘅電視台，希望可以做嗰啲由細睇到大嗰啲男一呀，嗰啲金牌司儀，行career path，但係喺我嚟講，好似唔係好啱我，不如喺呢度試吓搵啱自己嘅口味。」
強尼在訪問中亦分享了一個小故事：「前幾日喺公司金生（製作部副總裁金廣誠）見到我，佢講笑話我嘅角色『Lantau』衰格，我feel到佢係好開心，但係我話真係冇咁諗，Lantau對強尼嚟講，成個事業係好重要，但係我唔覺得做完呢件事之後，可以得到啲乜嘢，有人鍾意梗係好，但係更開心係俾人信任先係最重要，呢樣係開心過觀眾鍾意強尼、鍾意呢個角色。呢套劇未出街之前，成日同自己講，唔好對呢套劇有乜嘢期望，唔好諗人哋對我會有乜嘢期望，可能你會得我好假，但係係真心，我自己覺得只要大家鍾意《暖男》呢個就係我嘅目標，我有份參與，已經覺得係好重要嘅一件事。」
強尼又說在「Lantau」以前，未曾有過一個如此完整的角色，覺得獲觀眾愛戴是bouns，最重要其實是同事信任自己：「唯一一樣嘢可以肯定，就係公司、監製、導演同編劇搵我做呢個角色，就係代表佢哋對我嘅信任，嗰4、5個人對我嘅肯定，對於我嚟講，係一件好大嘅事。」經過今次，強尼承認有一定衝擊，感覺注入了一些新力量：「我一向對自己嘅工作好有信心，每一個工作到咗我手，我都有預備，我認為我係做到一定嘅嘢，對得住交呢個工作畀我嘅人，觀眾鍾唔鍾意，我冇辦法去控制，經過今次之後，我對自己信心多咗，夠膽下次做多啲，信自己多啲。」
採訪：唐琛悠
攝影：陳慧安、廖達燊
場地提供：Daisy Bloom
服裝提供：RDM STORE（Hailey）O.N.S (@onsclothing)(強尼)
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|