現年42歲的楊思琦雖然已經是兩子女之母，上天似乎對她不薄，至今仍然有一副童顏兼索爆少女身材。近日天氣嚴寒，氣溫突然跌到單位數字，思琦日前在社交平台進行「送暖行動」，貼上一張性感相贈街坊，相中的思琦穿上一件白色緊身tee，惹隱若現粉紅色bra top，打側仰臥大晒迫爆上圍，她留言說：「溫暖舒暢的夏天比較適合我，今天降溫，只能躲在被窩裡！大家要注意保暖啊！」
今年是思琦入行第20年，2001年因參加港姐而入行的她，當年一口氣奪得六個獎項，鋒頭一時無倆。但到了2011年，她被爆與李泳豪分手後火速暗交前跳水隊隊員吳帥兼懷有兩個多月身孕，令思琦形象直插低谷，更被標籤為「貪慕虛榮」，最後更在2014年黯然離巢外闖。她早前接受商台節目《1圈圈 星光背後》的訪問，回望過去的日子，雖然有人覺得她被感情所拖累，結果要賠上事業，不過她坦言未有想過自己有否行錯路，她說：「我又唔咁樣批判自己，行過嘅路係對自己有得着，唔會話嗰樣事件會令到自己有乜嘢損失，有冇俾感情拖累？冇咁誇張，『拖累』呢兩個字好似好沉重，可能我個人太坦白，其實好多藝人一入行都有拍拖，只不過係佢哋講唔講，又或者俾唔俾講。嗰陣因為人哋問我，我咪選擇講咗出嚟，原來係搞到咁沉重。」
主持人再問會否覺得因為感情而令事業有障礙？思琦笑說：「如果當時感情係遲啲出現嘅話，嗰陣嘅事業可能會更上一層樓，不過我冇乜競爭嘅心，但係我係畀好多努力去做好本份。」做了單親媽咪八年的思琦，在去年年初突然宣佈誕下細仔Kody兼秘嫁圈外男友，今次思琦低調處理家事，堅拒透露老公的任何背景，甚至有指囝囝跟隨母姓而被質疑是「虛擬老公」，思琦再三強調是對方的意思：「每個人嘅諗法都唔同，唔係個個都鍾意俾人注視，既然係佢嘅意思，我又覺得唔係乜嘢難題，所以都會配合同尊重。」
提到相識經過，思琦說：「我哋拍咗拖年幾，佢係一個好細心同好有愛嘅人，大家一齊嘅感覺好舒服，有好多嘢大家都好相似。我都好佩服虛擬老公呢個諗法，如果要作啲嘢去虛構，我就會好複雜，要記得之前講過啲乜嘢，又要延伸啲嘢，真係好難做，好容易穿煲。」之不過Kody遲早都要上學，到時他的真實姓名將都會曝光，思琦亦說：「呢啲係遲早都會發生嘅事，呢一刻要求，我咪保守秘密囉，佢又唔係圈中人，如果俾傳媒追訪，未必承受得到呢份壓力。」
在節目中，思琦亦爆大女Krystal一直都想有一個弟弟：「阿女喺4歲嗰陣已經成日話：『Mama, I want a little brother！』所以當佢知道自己有個細佬，佢真係開心到飛起，成日都攬住細佬。不過我初初都以為家姐唔會爭寵，直到有一次，家姐偷聽到我讚細佬叻，佢有啲唔開心會話：『媽媽，你點解淨係讚細佬？』之後我就意識到讚完細佬，都要讚埋家姐，要兩個一齊讚，就冇再唔開心。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|