3,650日x2，林二汶花了20年的努力，將於3月踏上紅館開個人演唱會，然而，這個機會能否實現，還要望天打卦，世事就是如此諷刺！
別的歌手入行數年就開紅館騷，而被連登仔形容「把聲靚到仆街」的二汶，等了20年得到叱咤「我最喜愛的女歌手」，找數開騷，卻可能要延期，世事就是如此諷刺！
「所以大家唔好退飛，哈哈哈！我盡做，拿拿臨埋班，早排我同演唱會幕後人傾偈，講緊係搭台嗰班兄弟，有啲人轉咗行，如果可以早啲，起碼有啲嘢可以希望住先，如果真係因為疫情關係要改期，咁咪大家一齊再等過囉！其實我都準備咗咁多年，都唔係一朝一夕嘅事，哪管可能得一次，對我嚟講係好大鼓勵。」悲觀的二汶，卻樂觀地說。
鏟青的型格、有份量的身形、男仔頭的外表，天生注定二汶不能恃靚行兇，別人開騷玩造型玩換衫，二汶卻以靚聲行兇，即場示範史上最強女歌手的本領，一人扮聲彭羚、葉蒨文、衛蘭演繹《電影院禮儀》，叫人拍案叫絕，「我係賣歌賣音樂，呢個係基本，我入咗行唔算好長，兩個十年，比起成個人生都係交畀呢個行業嘅前輩，我算得係啲乜啫，我係打咗長工嘅中層，叫做有主任仔做吓嘅年紀，咁多年嚟我最忠誠係音樂，紅館騷有自己程式，歷史以嚟咁多大artist，咁多驚喜畀人睇，但如果我為咗追求呢啲效果，唔記得自己本來應該唱好一隻歌畀人聽，咁我對唔住咁多年同我一齊嘅人，我賣音樂之餘，其實我係講緊一個夢想。」
小時候受哥哥林一峰影響愛上音樂，參加歌唱比賽認識盧凱彤（暱稱阿妹）組at17，19歲已經出道，「我係一個好普通女仔，喺屋邨長大，喺香港讀書做嘢，我嘅路話平坦唔平坦，話好多顛簸亦唔係，但我有我嘅故事，我希望紅館呢個係好開始。等咗20年？我覺得好好，行慢啲好，我慶幸能夠喺呢行留咁耐，一直都有機會，其實唔容易。早兩日，有幾個中學生同我影相，我出道時同中學生影相，我出道20年又係同中學生影相，其實都算係一種成就，我真係變咗汶姨，哈哈！」
有連登仔開post ：「點解林二汶唔紅，把聲靚到仆街」，她聞言大笑：「問得好，我到而家都冇覺得自己好紅，哈哈哈！應該咁講，我睇我而家嘅人氣，呢排關注度係高咗，但係咪等於紅呢？我覺得我好甘草，我係『甘草歌手』，天后係王菲、鄭秀文，多謝呢位市民，『把聲靚到仆街』，咁講有啲怕醜，我希望我對得住大家嘅耳朵。」
人貴自知，很多人都讚二汶聲靚人品好，她最知道自己的缺點，「懶囉，有好多嘢我可以勤力好多，其實我底蘊係一個悲觀嘅人，我好容易冇信心，只係好盡力希望大家開心，做好該做嘅事，但有時都會好軟弱，最唔好係成日都頂硬上。細個冇諗過入行，亦冇真正學過音樂，一味諗住如果打份政府工，每月穩定收入悶都冇所謂，我係一個想要穩定嘅人，但入行後唔會知下一步發生乜事，原來我好需要安全感，容易失望又驚做唔好。」
20年過去，回首每一步有笑有淚，2002年at17出道，2010年分開發展，2011年二汶成立個人品牌「Lam2」，「最難過嘅階段，係自己出唱片做老闆，我試過又冇錢又要找數，呢段時間好狼狽，畀唔到家用或畀唔到父母隨便食乜唔使睇價錢嘅生活，對我嚟講孝順係基本，但做唔到係幾慚愧，嗰下我會諗，係咪我唔應該再諗音樂呢？係咪我應該打份工呢？或者呢條路好長要磨練，但最後我明白係一盤生意，咁你咪學識管好盤數。」
捱過了金錢的關口後，2018年遇到更大的打擊，就是失去at17的另一半——盧凱彤走了！「發覺生命咁脆弱咁無常，當時我靜咗一靜，因為阿妹嘅後事，我寫咗一段文字，『呢件事係唔會ok』，喺我生命裏永遠有一份失去，嗰下我明白人嘅渺小，我惟有投降，原來有啲嘢，我幾樂天都冇用，發覺自己原來好細個，一夜之間你一定要長大。」
阿妹走後，每到忌辰，二汶都撰悼文，思念情真意切，「我喺呢件事之後，人去到咁亂時候，我慶幸當時遇到我嘅信仰，我係道家弟子，明白人其實好渺小，不如畀心機踏實過好每一日，呢件事影響係，我明白乜嘢係時間，真係可以一下子冇時間，連講拜拜都冇時間，更加覺得好多嘢唔係應份，老生常談係真，盡人事聽天命。」有甚麼想跟阿妹說？二汶：「I love you.」
生離死別最難過，當你希望身邊人分享喜悅時，偏偏他或她卻不在了！「其實我收到紅館期落實嗰日，我婆婆啱啱過身，起碼我講得切話畀佢知，『我開紅館呀，婆婆！』婆婆知道好開心望住我。」外婆跟二汶好親密，還支持她完成夢想，「我阿婆好潮，佢覺得年輕人想做就去做。我婆婆都係唱歌，好耐之前行路嚟香港，喺榕樹頭唱歌，潮州戲都係佢配音同幕後代唱，我阿婆唱歌好好聽。」
雖然外婆走了，幸二汶成為了父母的驕傲，「攞完獎第二日返屋企食飯，我阿爸見到我就係咁（豎起手指公），阿爸平時唔講嘢，我阿媽話噚晚開心到瞓唔着，我最唔開心係阿爸阿媽會擔心我嘅生活，關心你嘅人，唔係擔心你飛得有幾遠，係擔心你飛得有幾攰。」
時勢造英雄，因為《全民造星III》的加持，擔任導師的二汶都人氣高企，大家記起樂壇有這把好聲音，二汶獲得從未想過的叱咤「我最喜愛的女歌手」，還以為二汶獲獎後會睡不着，思潮起伏，她卻說：「其實冇，我係覺得如果有機會講自己入行20年嘅故事，唔知會唔會因為呢個獎畀到希望人，令大家覺得夢想都有到岸時候。我唔係一個好多曝光嘅人，唔係好靚女長髮偶像，我只不過係好普通女仔，有機會入行，我有一把聲，畀心機唱歌，真係好老正。」
生命中有很多別離，有些能有緣再聚，有些只能在回憶裏再聚，可擁抱時就要擁抱，38歲的二汶，這刻想擁抱誰？「我好浪漫，本來想答樂迷，但我想同未來嘅自己擁抱，想學畀心機做人，希望將來嘅自己更加健康，更加做到多啲嘢，可能教小朋友，生活喺香港，生活指數咁高嘅地方，講夢想好似好唔實際，冇飯開，只係為咗上台唱歌，何況真係經營一份職業，我覺得呢啲上上落落跌跌碰碰，將來嘅我如果可以繼續健健康康已經好好，起碼令屋企人安心。」
能踏上紅館，不但家人和樂迷戥她高興，好友岑寧兒都替二汶開心，特別錄聲鼓勵：「相信在場有同佢一齊大嘅觀眾，最長follow佢廿年，最短可能20日，我都期待睇一個音樂為重嘅紅館騷，加油！」二汶聽到寧兒的聲音很開心，「佢講得啱，有啲人可能跟我20日，我記得阿媽同我講過：『無論你上過幾多次台，你一定要同大家介紹自己：大家好，我係林二汶！』我會做一個屬於自己嘅紅館騷，我嘅初衷就係音樂，唔會令你失望嘅音樂。」
撰文：余燕儀
攝影：沈健程
攝錄：廖達燊、馮嘉銘
化妝: Kris Wong
髮型: Derrick Ng@W workshop
服裝: wagamamaplayground
場地：香港海洋公園萬豪酒店
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|