《蘋果》 X 《狂舞派》街舞大賽八隊入選隊伍陸續亮相，接受導師劉敬雯（Lydia）和楊樂文（Lokman）的賽前指導。今集就到兩隊經驗豐富的團隊「KINGBOTICS」和「SDS」亮相。
被導師Lydia形容為實力超班的Popping（機械舞）隊伍「KINGBOTICS」，成員包括Louis、小三和KaKa，均屬全職舞蹈員。成軍多年代表香港出國比賽無數，舞齡最淺的KaKa亦有11年經驗，Louis和小三則有超過15年舞齡。Lydia笑言在三位面前，其實導無可導。
對於投身街舞的原因，Louis憶述起初是被Hip-hop音樂吸引，才開始對街舞產生興趣，他形容以前跳舞給人的印象是不務正業︰「當時好多家長都唔支持自己小朋友去跳舞，好彩經過呢10幾年發展，而家跳舞工作嘅機會多咗，而且好多唔同類型，有演唱會、商業演出、主題公園，仲有教育系列，或者幕後搞活動、比賽，呢啲都關跳舞事。」
除了舞蹈演出和教班外，Louis以往會獲邀到世界各地的街舞比賽表演和擔任評判，而小三更是跳舞學校的老闆。然而，因為一場武漢肺炎令世界變了樣，疫情下重創了向來支撐舞蹈界的表演及教育兩大支柱，令一眾以跳舞維生的舞蹈員頓失經濟來源，Louis稱︰「整個2020年都留咗喺香港咩都做唔到，即使有外地邀約都接唔到，排舞場地封咗，學校興趣班又冇晒，基本上全年係零收入。」
身為舞蹈學校負責人的小三說起更是欲哭無淚︰「以我為例子，2019年9月開學校，經歷社運到而家第四波疫情，跳舞學校喺政府規範下屬於健身中心在內嘅公眾娛樂場所，所以必須要我哋關閉，唔可以做生意，即係一開門就犯法，明明教跳舞係正當生意，而家變咗犯法做咗罪犯，真係荒謬。」
小三認為要配合政府的抗疫措施關閉學校的做法無可厚非，但對業界及舞蹈員近乎零支援的態度就極度失望和憤怒︰「經歷咗半年有多，成個行業包括學校要強制停業，但政府畀嘅賠償Total得25萬，坦白講連租都唔夠交，一間跳舞學校每月營運金額7、8萬走唔甩，畀得25萬夠我哋交租定出糧？」曾跟政府反映業界苦況，可惜得到的回覆是︰「喺政府眼中，舞蹈員唔係正規藝術工作者，抗疫基金入面雖然有包括從事興趣班導師補貼，印象中有5000蚊，但作為街舞舞蹈員係連呢5000都冇，因為我哋不屬於藝術發展基金批出嚟嘅project，真係好離譜。」
不單支援不足，小三對政府厚此薄彼其他藝術工作亦相當憤怒︰「舉個例子，八和會館做粵劇嘅，大家都係從事藝術工作，政府一批就有1500萬畀佢哋，點解呢？得罪講句，因為入面有汪阿姐？真係聽到都嬲，但我哋呢個行業呢？隨口講都3、40間Studio，你覺得香港跳舞嘅人多定還是做粵劇嘅人多？」小三稱舞蹈業界範圍廣泛，包含健身舞、芭蕾舞和拉丁舞等，從業員人數眾多︰「講緊係成個舞蹈行業得到嘅賠償都唔夠一個八和會館多，真係極其荒謬。」
面對如此困境，Louis和小三他們暫時只能靠積蓄和做散工維持生計，但仍然對未來抱有希望︰「好多舞蹈員都轉咗行，有好多去做外賣、送貨，甚至地盤，都係邊度有工就去開，希望疫情過後會返嚟，呢段時間大家互撐啦。」
同樣經驗豐富的隊伍還有「SDS」，全名為「Street Dance Society」的三位成員包括擅長跳Locking（鎖舞）的Carter，跳House的Cyik和小彥，全部都有近15年經驗的全職舞者。回想當年因覺得有型而開始學街舞，Carter憶述︰「因為見到人哋跳好有型，然後開始自己上網搵資料，當時仲未有YouTube，要上網搵Hip-Hop Dance、Breaking Dance嘅片嚟睇。」Cyik則稱起初是柴娃娃性質，過程中才慢慢愛上到現在不能自拔。
成軍至今，「SDS」征戰過無數比賽，成員們亦有教授跳舞課，而在今次疫情下，舞蹈員行業自然成為重災區，他們直言只能暫時靠積蓄維持，Cyik說︰「因為限聚令，Studio嘅學生人數都抵消唔到場租，收入好大影響，就算仲有學生想學都會擔心疫情，所以基本上呢幾個月都冇晒工作。都嘗試做過Online Class，但對住螢幕同真人實在差太遠，所以都冇再做。」
經濟外，心理上影響亦很大，Carter說︰「少咗表演、比賽同上堂，大家好難聚埋一齊，跳舞本應一班人開開心心，但而家被迫留喺屋企。」在這困境下三人表示只能靠着對夢想的堅持，咬緊牙關撐下去「放棄嘅諗法一定有出現過，但當你見到一啲年紀大十年、廿年嘅前輩仍然堅持緊，我哋實在再搵唔到藉口放棄。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|