阿姨！我不想努力了︱Dee@Error擔正做舞男 出力滿足盧覓雪
- 發布日期：2021-02-11 14:31
已複製
一場疫情，令跳舞群組成為焦點，當中跳舞老師如何各出奇謀，施展渾身解數的搵食招數，亦一度成為熱話。今年港產賀歲網片《向西聞記 新春sp：阿姨！我不想努力了》，亦以跳舞群組事件包裝，引伸出一個爆笑瘋狂故事。
男主角是Error的阿Dee(何啟華)，喜感極強的他，被賞識首次擔正，不過對手唔係《美女郊遊遊》索女Shirley質素，而是重口味的盧覓雪。
故事講述阿 Dee 係天水圍落難古惑仔，被人追打到旺角，誤打誤撞之下闖入舞廳避難，因而結識了飾演跳舞老師的Tiger及舞廳經理泥鯭，而阿 Dee 和盧覓雪仲擦出一段似是而非的曖昧感情。
片中阿Dee咬住煙仔同條𡃁講：「從來做大事講三樣嘢，銀紙！銀紙！同埋銀紙呀！」這對白正係當年港產片《97古惑仔：戰無不勝》的萬梓良教「陳浩南」鄭伊健點做大事的金句，歷代古惑仔薪火相傳。
至於阿 Dee 同雪雪共舞，瞇住眼抿起嘴，話自己係跳舞老師：「叫我華仔得啦，因為好多人都話我似華仔。」加埋華式笑聲，相當搞笑神似！另外，片內亦有扮富婆的盧覓雪同演員泥鯭爆粗的對白，貫徹《向西聞記》貼地及自由創作的風格。
今次雪雪拍《向》片有兩個新嘗試，第一是首次在銀幕上狂爆粗，盧覓雪說：「其實我2019年下半年到依家，呢年半入面，我嘅日常生活都充滿住粗口，除咗聽人講好多粗口，我自己都講咗好多粗口，都冇諗過自己講粗口講到咁流利，所以呢個角色講粗口對我嚟講冇難度。」另一個新嘗試就係食煙，雖然雪雪從事報業出身，但她從不抽煙，「今次戲入面有個情節係阿Dee俾口煙我食，當時我係欣然接受。其實我唔識食，係有樣學樣，竟然過到關，因為我冇濁親冇咳到死，唯一係一cut之後即刻要漱口，好難受，啲味道難頂到爆炸。」
至於阿Dee除了講「錢錢錢」對白外，其實他亦即興加插張家輝在《掃毒》中的經典對白「耶穌都留佢唔住呀！」，阿Dee表示，「今次有啲嘢可以試下玩，導演好支持，所以拍攝好開心，試咗好多新嘢，希望呈現喜劇嘅感覺，大家睇完recall返港產片回憶，如果未聽過嘅就當係廢話笑咗去，最緊要大家開心，笑得出係我最大希望。」戲中講「耶穌」時，阿Dee仲要霸氣地叼住三枝煙，這個動作又係臨場jam，但由於要拍不同角度，所以他不停食煙，「希望觀眾感受到壞過凱婷嗰種感覺！嗰日食幾多枝煙真係數唔到，十零廿枝走唔甩。」
- Error的Dee(何啟華)，充滿喜劇天份，首度擔正的演出更是驚喜連連，跟盧覓雪好有火花。
- 重口味對重口味，睇完會唔會有渴意？
- 片中二人在舞場跳出曖昧感情，令人聯想近年跳舞群組鬧出的故事。
- 何啟華點解叫阿Dee，因為自覺有幾分似華Dee(劉德華)！齋吹冇謂，想知佢有幾神似，睇戲
----------------------------
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
|
鍾意就快D Share啦！
|
|
|