對於有前無綫編劇在ViuTV節目爆料指有男演員擅自改劇本兼加戲，蕭正楠與湯洛雯今晚出席無綫綜藝節目《開心大綜藝》時，蕭正楠對此表示：「有時對戲大家會執生，見到劇本唔順會改少少，相信啲編劇會明白，只係執順但唔會大改。（話有男演員覺得冇發揮，自己加戲份如跪地爆喊戲！）如果呢個情況，我一定唔會加自己戲，反而會改短，好睇個人，唔清楚當時情況，可能真係有咁嘅需要。（編劇話唔可以跟場，好多時唔知道。）呢樣一直都係咁，編劇工作量好重，作為演員，如果有編劇去跟場，絕對係歡迎。（編劇覺得不受尊重？）我冇睇過有關節目，但如果單憑以上幾點，就唔係唔尊重。」
他又開玩笑指對手湯洛雯最喜歡改劇本，湯洛雯即說：「我點會，我咁鵪鶉。其實演員好少大改劇本，改少少就會。」同場的馮盈盈亦自言拍劇經驗尚淺，不夠膽改劇本：「其實拍劇以來，冇見過有人改，有時一班人一齊對稿，有啲新諗法都係成班人同導演一齊商量，希望劇本順啲同有多啲火花，呢樣嘢都係大家一齊去做。」
來源 source: http://hk.on.cc
|
鍾意就快D Share啦！
|
|
|
