2021年5月19日星期三

賀阿Dee呃Like Po過十萬《自肥》Mike導用特別版「死亡行星」贈慶

特別版「死亡行星」好硬，一撞落阿Dee個肚好大聲。

ERROR主持的ViuTV節目《ERROR自肥企画》播近尾聲，節目捧紅咗格仔Mike導（劉諾衡）同主題曲《無制限OT編集団の行動綱領》，之前Mike導就話主題曲MV過150萬點擊就會有特別演出，好嘞，尋晚已完成壯舉，Mike導表示「講得出做得到。」但要畀六個月時間佢，咁弱嘅快啲啦。

前日嗰集，Mike導就話好鍾意一班人為節目自製道具，當中包括懲罰工具「死亡行星」，Mike導冇詳細介紹，但就話有多位成員親自試過威力。咁其實威力有幾勁有睇過節目都好清楚，193都話小33由金菇變猴頭菇就知「死亡行星」係咩料。

尋晚，Mike導為慶祝阿Dee呃Like Po成功過十萬而用特別版「死亡行星」招呼佢，點解要咁做?唔知呀，只係知道被重擊嘅阿Dee爆晒粗，個肥肚仲紅晒，好好笑。(段片已嘟粗口想聽原版唔使教啦)