林文龍、郭可盈這對恩愛夫妻轉眼結婚十七年，幸福背後經過唔少考驗，二人經歷不少磨擦爭吵，甚至走過瀕臨分手邊緣，才成就到今日這段美滿婚姻。郭可盈曾大讚老公EQ高，是上天賜她的另一半，對於太太的讚美，林文龍表現受落：「我相信我對佢所做嘅一切，未必搵到第二個人做到！」坦言同太太嗌交會先讓步：「揀得嗰個人，有啲嘢吞咗去算！」以柔制剛細水長流，林文龍果然EQ高！
- 兩人04年在洲際酒店舉行婚禮共諧連理，18年酒店進行翻新工程，林文龍夫婦帶同女兒津津（林天若）staycation重遊舊地，相當有心思。
夫妻點會冇問題
夫妻點會冇問題
林文龍與太太郭可盈，95年因拍劇集《萬里長情》緣牽一線，拍拖九年修成正果在04年拉埋天窗，一起走過26年，感情在風浪中茁壯成長，兩夫妻愈來愈恩愛，加上11歲愛女津津（林天若）乖巧聰慧，一家三口幸福無邊！談到夫妻相處之道，林文龍答得坦白：「冇㗎 ！我覺得夫妻相處又好，同事又好，朋友又好，其實都要尊重、包容，呢兩個大前提走唔甩，如果你唔識得尊重人哋，人哋唔會尊重你，如果你唔識得包容對方，人哋一錯你就去𡁻人，去話人，個關係唔會處理得好。」在《不懂撒嬌的女人》演型佬時裝集團高層Gordon的林文龍，劇中同Mall姐分手多年再復合，期間二人再次面對考驗，Gordon一場浪漫道歉成功KO霸氣Mall姐，當中一句深情對白：「兩個人點會冇問題，只要多啲包容，多啲忍耐，自然解決到！」，林文龍自爆這場戲由他創作，這句對白更是來自他的手筆，這個改動除了反映他對劇本的執着，亦反映了他的愛情觀！
- 林文龍、郭可盈因拍劇結緣，先後在無線合作拍了兩部劇，除了定情劇集《萬里長情》，還有相當受歡迎的《十兄弟》。
兩個人相處係咪要咁執着
兩個人相處係咪要咁執着
林文龍夫婦性格一凹一凸，反能夠互補不足，就如螺絲跟螺旋帽一樣緊緊相扣，郭可盈曾多次在訪問中自揭脾氣大，作為人夫的林文龍會以柔制剛，每次夫妻爭吵他會讓步平息問題。「有乜所謂啫，人生短短幾十年，你揀得嗰個人，有啲嘢吞咗去算！「我以前後生時，我必須要解決，譬如今日發生呢件事，點解發生呢件事，我係要查根問底，係你錯，你就要道歉、或者做啲咩先settle件事，咁就死，會將件事Last好耐，其實冇意思㗎 ！最後證實係你錯，我講咗句對唔住咁又如何，兩個人相處係咪要咁執着呢，輕輕地smooth 過咗去咪算囉！咁執着冇意思嘅！」
對於太太郭可盈曾以「上天賜給我的另一半」形容他，指他對自己有好多包容，林文龍有感而發：「咁又自問喎！我相信我對佢所做嘅一切，我真係覺得除咗我，未必搵到第二個人做到，呢個係真心說話！
「亦都調返轉睇，如果唔係佢，唔會俾到咁多歷煉我，俾我早啲成熟，或者令我EQ提高，所以好多嘢係相輔相成，有好處亦有壞處。」
- 退出十二年專心相夫教女的郭可盈，近年不時在社交網po相放閃，向粉絲派福利，不過至今仍未有人能成功打動她復出！
- 陀住囡囡便宣布退出的郭可盈，陪住女兒津津（林天若）每個成長階段，母女感情相當深厚。
佢事業又好過我幾多
佢事業又好過我幾多
太太郭可盈來自大富之家，父親郭達昌經營塑膠生意，擁有五間公司，被指身家以億計，加上郭可盈出道不久，已憑劇集《刑事偵緝檔案》系列走紅，相對出身小康的林文龍，外界經常以「女尊男卑」形容，經常被人將他和太太的事業與家底拿作比較，林文龍處之泰然。「其實有咩事業同家底比較，你平平淡淡寫，兩個人冇咩特別嘅，寫出嚟有冇Attention ？冇！有冇新聞價值？冇！咁咪一定要搵啲嘢寫！「佢事業好過我好多，佢事業又好過我幾多？佢家底好過我好多，係！真心佢家底係好過我，但你知唔知，你哋啲行家寫佢屋企有幾多家產！有份寫嗰個坐出嚟同我講，少咗幾多，我只係要番你十分一或者百分之一，你賠番俾我。
「由Day1到依家，我都非常淡然！
「你知唔知我結婚喺洲際酒店擺酒，有一本週刊話係我外家埋單，其實由我Credit Card扣數，唔通第二日開記者會澄清，俾條數你睇咩！
「我會覺得唔緊要，我嘅EQ settle到就算！」
湊女一腳踢不假手工人
湊女一腳踢不假手工人 10年寶貝女林天若（津津）出世，除了緊扣住郭可盈的心，令她甘為女兒退下火線做全職媽咪，林文龍對這個前世情人的上心程度，其實不遜於太太，廿四孝爸爸更直言無意追多個！
「因為我做每一件事都會好認真，所以我個女出世之後，我對佢係超級一萬分認真。
「曾幾何時試過拍戲期間，阿女發燒，醫生話最近幾日嘅情況會好似坐過山車咁樣。我好記得當日係收凌晨三點鐘，之後返屋企，然後接六點鐘通告，即係由返到屋企到出門口有三個鐘時間。但我沖完涼之後無瞓過覺，而係坐喺阿女側邊，同佢探熱，用濕毛巾幫佢降溫，一直睇住佢，嗰三個鐘完全無瞓過覺。
「但老婆見到我返嚟之後就好安心瞓覺。我會覺得無所謂，其實兩夫妻有咩所謂，但問題係因為我太上心，其實如果換轉一般家長，就應該將小朋友放喺工人身邊，交俾工人去照顧，但我唔會，會自己照顧番。
「包括我個女出世後，請陪月返嚟，我係學晒洗頭、沖涼、換片、餵奶、掃風，所有嘢都係我做，頭一年我係推晒所有job，我女出世嗰一年我係無接過任何拍攝工作！
「所以因為我性格係咁，一個人隨着年紀大，你嘅體力係差咗，尤其是我咁上心，我知如果我再生第二個，第一可能我會好攰，第二我唔知我會唔會處理得咁好！」 ![一家三口舉杯慶祝，囡囡津津以水代酒祝賀爹哋媽咪。]()
- 一家三口舉杯慶祝，囡囡津津以水代酒祝賀爹哋媽咪。
![女兒津津遺傳了父母的優良基因，除了外表甜美，更加品學兼優是校內高材生。]()
- 女兒津津遺傳了父母的優良基因，除了外表甜美，更加品學兼優是校內高材生。
![林文龍坦言每日工作完畢，回家看到太太和女兒，一家人共聚天倫已經令他心滿意足！]()
- 林文龍坦言每日工作完畢，回家看到太太和女兒，一家人共聚天倫已經令他心滿意足！
旅行必定三人同行 兩個大小情人成了林文龍的人生動力，他坦言自女兒出世後，所有長短途旅行都必定是三個人同行，享受三人世界的幸福。「好sweet，可能我細個長大嘅過程中，屋企人觀念比較傳統，爸爸係傳統中國大男人，喺爸爸口中從來未講過，唔知點解廣東話嘅我愛你好難講出口，但I love you其實好普通，但佢都未講過，一次都未聽過。但我對住我女講I love you嘅次數，我諗已經係多不勝數，錫阿女嘅次數係數唔到，基本上每一日張開眼，只要佢唔嫌棄我嘅話，我係會不斷錫佢！」
寶貝女津津是夫妻的掌上明珠，不單遺傳了父母的優良基因，更加品學兼優性格善良，是個內外兼備的小美人，提起愛女林文龍讚不絕口。「佢係好乖好有discipline、同心地好好嘅女仔，舉個例子，之前帶佢去朋友屋企食飯，有幾個年紀比佢大嘅小朋友，大家一齊捉棋，嗰種棋佢未玩過。如是者佢玩咗兩三局之後，到最後一局佢贏咗，但只要佢擺嗰粒棋去嗰個位，佢可以贏得更多，不過佢就唔擺嗰個位，而係擺另外一個位，結果都贏，但只係贏好少。我返到屋企之後問佢，點解唔擺嗰個位，明明擺嗰個位可以贏好多，佢話唔想，因為今日先至學，如果擺嗰度贏咁多，我驚佢哋會唔開心，佢會咁樣幫人諗！
「有好多生活上嘅事情，佢都好識得幫人諗，我諗本身係天生嘅，所以佢係一個心地好善良嘅女仔。呢方面我好感恩，係天生嘅，當然我哋都有教佢！」
撰文：琪琪
攝錄：Tsang Wai Wai
場地提供：鏞鏞 • 藝嚐館
----------------------------
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
- 一家三口舉杯慶祝，囡囡津津以水代酒祝賀爹哋媽咪。
- 女兒津津遺傳了父母的優良基因，除了外表甜美，更加品學兼優是校內高材生。
- 林文龍坦言每日工作完畢，回家看到太太和女兒，一家人共聚天倫已經令他心滿意足！
來源 source: http://nextplus.nextmedia.com
|
鍾意就快D Share啦！
|
|
|