認聲大大勁Hyper影響唱歌 陳凱詠努力改善大頭蝦性格
陳凱詠（Jace）日前接受許文軒（Edmond）主持的TVB娛樂新聞台節目《StarTalk》訪問，她表示首張實體專輯《PROCESSING》記錄了自己出道至今的過程、
轉變和唔同面向。談到唱片造型以綠色為主，Jace笑稱：「我係一個後知後覺嘅人，自己鍾意綠色都唔知，公司開會時，佢哋好快就話我係屬於綠色。其實綠色真係好啱我，因為綠色對我嚟講係一個有趣嘅顏色，第一時間會諗到環保、自然，而我又鍾意真實，亦希望畀人感覺係一個有生機嘅人；而螢光綠色畀人感覺好前衛、好難着上身，但我就成日着綠色上身，可能會令人抗拒同有鬼五馬六嘅感覺，所以綠色係代表我咁極端嘅面向。」
新歌《I Wish》屬輕快跳舞類型，自中學開始跳舞的Jace卻自言稱不上好鍾意跳舞，甚至有段時間質疑自己，「如果好鍾意跳舞，點解唔係日日練習？點解自己只係去到呢個Level？其實應該係唔夠鍾意！而教小朋友跳舞係因為自己好喜歡小朋友，借佢哋過橋。除咗教佢哋數拍子、拉筋、聽音樂之外，仲會教佢哋操行、尊師重道。我入咗行之後就停咗教班，有時會喺度諗，幾時先有機會係工作入面再接觸小朋友呢！」
說到要改善「忘我」的性格，Jace表示：「平時講嘢太大聲，情緒太高漲，會影響唱歌，呢個真係要改！之前試過睇演唱會瘋狂大叫，我係一個睇演唱會唔留力嘅人，太興奮，最終搞到第二日出騷沙聲唱唔到。另外，我成日都唔見嘢，又唔補妝，搞到同事成日幫我執手尾，呢啲大頭蝦性格我已經改緊！」
來源 source: http://hd.stheadline.com
|
鍾意就快D Share啦！
|
|
|