疫情持續將近2年，唔少打工仔凍薪嘅凍薪，失業嘅失業，為咗生活開支可以話係R晒頭。衣食住行樣樣都係錢，日本最近一個節目《ABEMA 変わる報道番組#アベプラ》，就邀請咗一位39歲無業男上節目，呢位無業男勁就勁在已經3年無工作，零收入零儲蓄下，每一日只靠7部手機，免費獲得住宿同食物，簡直係令網民同小編我都大開眼界！
撰文：馬高斯 ｜圖片來源：ABEMA 変わる報道番組#アベプラ、[email protected]どぴゅ監督@エロ乞食バックパッカー｜編輯：海月
39歲無業男、零收入零儲蓄
呢位失業男叫「どぴゅ監督」，今年39歲，原來佢以前係從事電影行業，仲參演過AV做素人配角仔，亦都做過唔少兼職炒散。不過喺3年前慘成失業大軍嘅一員，然而佢做嘅唔係搵工，又唔係食軟飯，而係另有絕橋！
首先就係食物方面，失業前嘅佢持有7部手機，失業後就用持有嘅手機，去唔同嘅餐廳、超市等店舖，透過用手機打卡簽到、填問卷、玩遊戲等方法，換取免費食物同日常用品！
另外，「どぴゅ監督」亦建議登記信用卡，指有時信用卡嘅迎新禮物相當高質。如果係價值高嘅物品，就會攞去轉售套現，再攞去交電話費或其他開支，有時佢仲試過迎新係入住高級酒店！
至於住宿方面，佢係長期靠朋友接濟，三位朋友屋企輪流住，作為交換，佢會幫手做家務、帶狗散步，或者做跑腿代勞。解決咗食同住，每日著嘅衫都好重要！佢身上嘅衫褲鞋襪，一係同朋友交換嘅二手衣物，一係就街外執返嚟棄置衣物。另外，「どぴゅ監督」強調絕對唔會收朋友畀嘅錢，一齊食飯都會堅持AA制。
睇到呢到，相信唔少人都同小編一樣有個問題，就係搞咁多樣，有手有腳點解唔搵工返？佢就透露，3年前曾經有一份做電影導演嘅正職，不過佢覺得幫人打工好唔穩定，成日都會擔心失業嘅焦慮。而且佢唔想畀工作影響生活，朝九晚五都畀晒公司，壓力好大。
最後佢認為而家嘅方法都係生存技巧嘅一種，所以唔想工作。咁呢位「どぴゅ監督」喺Twitter會分享佢嘅慳錢心得，不過有時都會受到網民嘅負面回應，覺得佢好厚面皮，只係為身邊嘅人帶嚟麻煩。
來源 source: http://www.nmplus.hk
|
鍾意就快D Share啦！
|
|
|