首次設計遊樂場設施 林德信憶童年愛將廚具當樂器
林德信（Alex）最近為「時代廣場xBotanic Union《It's Play Time!》創意植物遊樂園」擔任設計師，設計富有藝術感的遊樂場設施給小朋友玩。對於這次經驗Alex相當興奮，亦將兒時最愛將廚具當樂器這靈感加入設計內，令他勾起不少童年回憶，而他最希望透過這次活動，大家能夠加深環保意識。撰文：杜淑霞 攝影：張詠森
開心能參與今次創作的Alex，解釋靈感源自小時候回憶，「設計係同音樂同埋聲音有關，我細細個大概兩、三歲度，我媽咪話我好鍾意每晚食完飯，就會拉開個櫃桶攞晒個鑊啲嘢出嚟，跟住就會好似打鼓咁樣，所以我呢個installation就係用番我童年個興趣，再同Botanic Union一齊設計得藝術啲，但係都可以玩到呢個聲音嘅效果，係發聲嘅藝術品，可以畀啲小朋友喺度玩，同埋最開心同Botanic Union合作，就係可以有多啲綠色嘅原素可以畀啲小朋友一齊接觸到，細啲嘅時候畀佢哋快啲接觸到大自然。」
加深環保意識
Alex今次由設計到跟團隊製作大約花了3個月時間，近兩個禮拜他見到製成品初形已好興奮，今天見到全部製成品他即化身大細路周圍玩周圍跳，他相信小朋友見到這個設施會跟他一樣high，「今次覺得最有意義係專係design for小朋友，𠵱家啲小朋友因為疫情，已經一年成日要收埋喺屋企或者少咗機會出去玩，我會形容呢度係Time Square嘅Oasis，可能你出嚟食飯行吓街，見到一個咁豐富綠色嘅世界，我諗小朋友佢哋會好開心。」
講到今次活動加入好多環保元素，Alex坦言feel到環保呢個主題近年變得愈來愈主流，「呢樣嘢好好，我覺得全世界嘅國家都做緊環保呢件事，其實呢個係我哋責任，係全界所有人嘅事，大家生活習慣可以好啲，希望愈多活動同大牌子，佢哋將環保變成佢哋工作模式或者生意模式，咁就更好」他又好慶幸小時候能夠跟大自然好多接觸，「我細細個好好彩喺三藩巿住，可能每個weekend我哋road trip，唔係好遠揸40分鐘已經可以去啲好大嘅樹林，細個都接觸到大自然嘅環境，喺香港都有嘅，可以出去行山，但係點解巿中心唔可以綠色啲呢？！我幾年前去泰國旅行，好多商場好綠色，所以今次呢個活動好有意義，可以將綠色發大啲！」
|
鍾意就快D Share啦！
|
|
|
