歌手吳業坤同「日本通」周奕瑋為無綫東京奧運主持，2人喺《東京五輪直送》節目中截停採訪港隊賽艇女將洪詠甄，吳業坤因一句：「冇呀（冇嘢問洪詠甄），你走」即被網民狂轟，更成陳約臨「花癡採訪」後被圍攻對象！
網民連番插爆2人冇腦欠專業，態度輕佻，更指2人唔識尊重運動員，一夜間變網民「公敵」，吳業坤即刻知衰，今日（3日）就喺社交網貼上黑圖，並留言公開向洪詠甄道歉，先後用「不專業」、「失言」等字眼，更指自己已經私信對方道歉，又呼籲大家繼續支持香港隊嘅選手。惟網友仍然唔收貨，繼續留言大鬧，同時亦有粉絲大嗌撐佢。
不過稍後時間，洪詠甄都主動現身為吳業坤「解圍」，直認有收到吳業坤嘅私信道歉：「唔好意思，太突然。」仲勸網友唔好再過度反應喺呢件小事，叫網友好好享受今次奧運賽事，即被大讚佢態度大方，處理得宜。
而周奕瑋亦有貼出道歉文，稱訪問當日佢都有同洪詠甄道歉，依家再次向對方作出誠懇道歉。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
