2021年9月7日星期二

【頭條獨家】鼎爺目擊準新郎嬲「賣女」掃枱肥媽堅持生仔要緊願意養埋個孫 #李家鼎 #肥媽 #鼎爺

鼎爺目擊準新郎嬲「賣女」掃枱肥媽堅持生仔要緊願意養埋個孫

節目中肥媽堅持下一代一定要生仔，仲話唔介意養埋個孫。

TVB清談節目《代溝關注組》主題貼地又好笑，愈做愈有驚喜，繼21歲游嘉欣（游游）喺首集節目中自爆係「A0」，就被肥媽質疑係假處女成熱話！「尾二」嗰集李家鼎（鼎爺）就自爆曾喺自己食店目擊有準新郎不滿女家「賣女」嬲到掃枱！肥媽就堅持下一代一定要生仔，仲話唔介意養埋個孫。採訪：方騫平攝影：葉君海

陳詩欣、蔡嘉欣、林正峰、黎學勤、楊潮凱、張秀文、區永權大讚鼎爺、肥媽、黑妹姐係開通嘅長輩。

《代溝關注組》以歡笑溝淡代溝，「尾二」嗰集肥媽、黑妹姐、鼎爺跟陳詩欣、蔡嘉欣等探討禮金問題。待嫁陳詩欣爆朋友的朋友苛索50萬禮金加車，搞到男家唔太開心。鼎爺也見過有親戚開50萬加100圍酒席，男家一肚火滿足完女家要求後，男家同女家斷六親，鼎爺說：「我好憎呢啲，問題係有冇咁多親戚先？」他又透露身邊亦有個「好霉」嘅朋友因為冇要求，女婿竟送上兩張合共過千萬嘅支票！至於肥媽就話見過男女家因拜山問題嘈交，笑言：「真係留返拜山先講！」

陳詩欣讚肥媽係好奶奶

陳詩欣將於9月尾過大禮，禮金交由未來老公處理：「雙方家長坐低食飯只係閒聊，完全冇提過要幾多，因為我覺得都係心意，我爸媽都唔係在乎呢樣嘢，我冇同未婚夫提出，到時拆利是先知係幾多。」她又大讚肥媽及黑妹姐係好奶奶，新抱生完會送瘦身療程：「真係大開眼界，聽到都雙眼發光，不過，我未來奶奶都好好，成日煮嘢我食！」另外，肥媽堅持下一代最重要生仔，如果下一代冇經濟能力，唔介意養埋個孫；黑妹姐話最緊要孝順；鼎爺強調要有溝通，新抱要講要問，對長輩要有禮貎。