到底「聲夢三小花」炎明熹（Gigi）、姚焯菲（Chantel）同鍾柔美（Yumi）人氣有幾勁？睇佢哋所到處，粉絲群人頭湧湧，擺埋應援陣就知道啦。日前15位「聲夢」學員着埋校服到某學校出席無綫青春歌舞劇《青春本我》嘅拜神儀式記者會，雖然嗰日朝咁早，天氣又熱又落過雨，但點都唔會阻到佢哋啲粉絲到場支持嘅決心，Gigi啲「Gi炎粉」就掛晒Banner，Yumi嗰啲粉絲負責叫口號，而Chantel啲「小菲象」粉絲就舉牌，場面好熱鬧，而佢哋「三小花」又點回應班支持嘅應援呢？
Yumi就最Sweet，喺學校露台見到佢班支持者，就離遠送飛吻，總之個個都有份；Gigi同Chantel玩理身，趁拍攝空檔就行出學校門口同班粉絲合影同任人影，Gigi更揸無形咪同啲粉絲大合唱佢嗰位熱爆歌《真話的清高》。
Chantel則甜美笑容大放送，親身多謝「小菲象」嘅支持：「好開心，冇諗過有咁多人支持，本來門口冇咁多人，但拍拍吓，點解無啦啦有咁多粉絲喺門口，好多謝你哋咁遠都嚟支持我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
