羅霖的三名兒子已長大，她更於去年榮升奶奶，其 22 歲二兒子 Jordan 在美國結婚，一眾好友都祝福她快做嫲嫲。事隔一年，她渴望再升级嗎？「我仲未抱孫呀，唔心急，我鼓勵佢哋多啲二人世界，做咗爸媽後全世界嘅注意力就會畀晒 BB。雖然（我）未見過新抱，但係我哋好了解，我畀佢 100 分。佢哋好恩愛，又好想結婚，真係難得。呢個世界好多夫婦結婚都唔係真愛，好多係因為環境因素，搵到真愛而結婚，我真係好祝福佢哋！」羅霖透露自己早已將所有首飾分成三份，給三名兒子，更特別揀選了一枚戒指送贈新抱，待日後見面時親自給她。羅霖開心說 Jordan 已找到實習工作，並正儲錢修讀心理學碩士，所以免收他的家用：「做人最緊要搵到一份自己喜歡嘅職業。我入娛樂圈並非我想，當年入咗無綫兩年幾，做緊《真情》『雙雙』角色好受歡迎，但我要結婚就離開咗 TVB，諗返起真係好可惜，如果畀我再揀，我會繼續留低，唔會結婚。」
已離婚近 10 年，她自食其力把三兒子養大，回想起來有苦有樂：「我本來唔想再租樓，但最後決定用一層樓嘅錢供佢哋去美國讀書，佢哋知道o架。因為小朋友嘅知識係一世嘅，錢冇左可以再賺返嚟。」羅霖說自己 50 多歲年紀大，沒有樓在手不知怎麼辦，但無論如何也得供孩子讀書。她指兒子在單親家庭長大導致心理有陰影，所以會在他們面前扮強者，更不希望將負面情緒帶給他們：「我喊完出嚟都係對住佢哋笑。肥媽教我唔可以咁樣，教我要做戲，等佢哋知道媽媽辛苦，要懂得珍惜……記得一次我失聲，要寫紙仔，佢哋以為我就快死，一個煲粥、一個斟水，真係激死！以後我都要扮下嘢，要佢哋愛得及時。佢哋成日以為我得 30 幾歲，我 50 幾歲腰骨好痛，都要叫佢哋幫吓手……」
跟前夫已分開多年，羅霖表示也想和對方做朋友，更加希望兒子們愛爸爸。她認為夫婦離婚後成為陌路人沒問題，但對子女的成長就最好有商有量，可是對方的想法不同，她也沒辦法。「我教啲細路過時過節要有信息畀爸爸，因為你恨一個人，一世都會好辛苦，一定要放低（過去），面對未來，唔可以憎人，（憎人）只會折磨自己，好蠢！我唔講咁多前夫嘅嘢，我唔可以講佢嘅壞話，總之我哋對仔女嘅相處方法係相反。我講我自己好嘞，免得收律師信。佢而家都有家室，費事以為我仲掛住佢，哈哈，我講笑呀！」
被問及有否「第二春」，羅霖表示三名兒子也贊成她拍拖，她亦曾帶同小兒子跟男朋友一起旅行。不過，她怕因感情再遇挫折而崩潰，所以現在她只專注工作賺錢，暫時為了孩子放棄幸福。「以前將緣份放低晒，未來就要睇我自己嘅命運，有就有、冇就冇，冇得強求。如果遇到就係我嘅福氣，我希望對方能夠同我心靈溝通，好健康，唔好要我照顧，乜嘢年紀都得，不過最重要心地善良，但係我暫時未有對象。」
|
鍾意就快D Share啦！
|
|
|
