歌手鍾雨璇昨晚（27日）出席《新城勁爆頒獎禮2021》時，於上台影大合照時，腳軟頭暈倒地，更一度走光，最後由陳展鵬和吳浩康等人抬走。她今早（28日）出席新歌MV拍攝時強調已沒大礙：「真係好唔好意思，搞着大家，想同大會同扶我嘅展鵬同吳浩康講聲唔好意思。（依家情況點？）只係右邊膊頭同小腿仲有啲痛，應該係跌落地撞親。（睇醫生未？）真係冇時間，拍完MV會去睇跌打。」
她指因前晚與婆婆到尖沙咀睇燈飾時，疑未做夠保暖措施而感冒：「第二朝起身把聲沙晒，即刻喺屋企攞啲中藥同西藥食。（又中又西？）琴日下晝出活動工作人員都有提醒我，見朝早食完冇乜嘢所以繼續食。」她稱事發時身穿3件外套，未知是因太焗、感冒、藥物或剛巧生理期虛弱所致暈倒：「其實當時係有知覺只係眼前睇唔到嘢，得黑白雪花，有試過想企起身但唔得，所以我仲識得一直用雙手掩面，因為覺得好瘀呀。（今日唔休息吓？）唔想再拖延大家進度，所以拍埋先去睇醫生，其實我真係冇乜事，好多謝大家關心。」她表示日後若遇上身體不適，不會再冒險出席活動。
本文作轉載及備份之用 來源 source: http://hk.on.cc
|
鍾意就快D Share啦！
|
|
|