藝人陳凱琳婚後減少幕前演出，成功轉型做「KOL天后」，疫市獲獎之餘，更賺得「一桶金」，估計營業額高達8位數字，名副其實的人生勝利組。近日她更染指幕後當上節目監製，忙湊仔之餘又「兼職」不同娛樂工作範疇，實行有殺錯冇放過！
入行僅9年的陳凱琳（Grace）已經歷獲無綫力捧、結婚及生仔等重要人生階段，近期她專注照顧家庭，但仍不時抽空在社交網與粉絲互動。成功榮升「KOL天后」的她深受不少品牌愛戴，紛紛擲銀彈邀她拍片「疫市代言」吸客，據悉她更擁有自家團隊，協助拍攝相關視頻，相當專業。
綜合各大社交平台數據後，Grace勇奪年度「品牌最愛」殊榮。據悉，她在疫市中依然搵到盆滿缽滿，估計營業額高達千萬。而她得獎後感慨表示：「去年是比較難度過和克服的一年，所以每次有些不同的工作機會和合作夥伴，我都會非常感恩，亦很多謝觀眾繼續看我的資訊和創意短片，希望大家可以互相扶持。」現時Grace吸金力超強，加上老公鄭嘉穎一直支持她追事業夢，搵奶粉錢的重任有賢妻分擔，鄭嘉穎大可無後顧之憂，全力投入演藝事業，接拍更多高質作品！
「碌爆卡」搵朱千雪幫手
Grace已不下一次表明因湊仔關係，短期內很難有影視劇作推出，但百足咁多爪的她除了成功轉型做KOL外，近日更「升呢」涉足幕後，為明珠台於暑假推出的清談節目《Love Matter》擔任監製！「陳監製」今次兼任主持，更碌爆人情卡邀來各方好友撐場，一連12集節目近日已密鑼緊鼓進行錄製，台前幕後前日就現身大埔為首集拍攝開工，Grace邀來久違了的好姊妹朱千雪（Tracy）擔任嘉賓，兩人甫見面便雞啄唔斷，齊齊分享婚姻之道。
談到兩人的友情，Grace說：「主要係我哋差唔多時間出道，Tracy今年就入行10周年喇，而且我哋都結咗婚同埋好多嘢講，最巧合係我哋嘅老公都唔鍾意講嘢，嘉穎直情同啲朋友講：『好喇，依家有人幫我講埋我嗰份。』哈哈！」問到Tracy可有向Grace討教生仔經？她笑說：「遲啲先啦，呢方面順其自然，我哋都係結咗婚3年啫，想再享受吓2人世界先。（你再拍劇嘅機會好微？）主要係相信劇組唔會遷就我時間，做吓呢啲清談節目咪好囉。」
至於首當監製，Grace大叫好玩：「因為籌備嘅時候我畀咗啲意見，好似愈理愈多嘢咁，佢哋就叫我做埋監製。嘉賓名單都係我親自邀請，每集傾嘅主題都唔同，嚟緊我孖生細佬都會上嚟，因為佢就嚟移民加拿大，我同佢未試過分開咁耐，好想畀個難忘嘅回憶大家。（幫佢打點收拾？）都會嘅，不過佢大個仔又結咗婚，會有佢自己嘅打算。」她同時亦忙於拍攝《日日媽媽聲》第2季，相當忙碌。
十大風雲人物唔易做
其實不少藝人都花盡心思管理自己的社交平台，張敬軒及李璨琛的女兒李元元（Lucy）都打入「香港社交媒體風雲榜」十大風雲人物，其他得獎藝人還有人氣男團MIRROR 成員呂爵安及姜濤、倪晨曦、七仙羽等。軒仔成為「早餐界KOL」， 因其外傭「遮遮」炮製的早餐經常成為熱話。
Lucy則被指是「年紀最輕的KOL」，Lucy媽將她一手捧紅，經常幫女兒拍片放上網， 深受網民歡迎，日前又分享她穿上吊帶凸腩泳衣坐在浴缸扮出水芙蓉，一路唱歌一路玩玩具的短片，Lucy媽笑言女兒最愛唱歌，覺得自己唱歌好聽， 問大家可有興趣幫她出唱片， 相信會爆紅。而「網民最愛」的得獎名單則有盧瀚霆、姚焯菲、炎明熹、張天賦、李佳芯、朱千雪、衛詩雅等。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
