內地女星吳謹言之前經常被網民批佢樣殘、演技差，但因為佢同許凱合拍古裝劇《尚食》，圓咗粉絲喺另一齣劇集《延禧攻略》中，佢兩個「最強CP」唔可以喺一齊嘅心願，吳謹言嘅人氣立即提升番，而喺《尚》劇中飾演佢閨密「殷紫萍」嘅何瑞賢都受惠，升呢做新劇《珍饈記》嘅女一。
不過呢個世界上真係針冇兩頭利，被話係《尚》姊妹劇嘅《珍》劇開始宣傳，個故事講何瑞賢飾演嘅凌小小，獲得由內地男星王星越飾演嘅太子賞識，入咗皇宮嘅「珍饈房」，之後仲同太子發生感情。
點知啲網民就好唔Like，因為《珍》劇嘅背景、人物設定、服飾、場景等，就連部分演員都係同《尚》劇一樣，唯一唔同嘅係何瑞賢直接變成女主角，但吳謹言就連影都冇。
製作人于正見到《珍》劇被網民鬧到爆，撲出嚟解釋話《尚》係正劇，有好多情節要刪走，但係《珍》劇就有好多空間發揮，好多故事都可以喺廚房度發生，又補充《珍》劇嘅衣飾雖然同《尚》劇好似，但其實全部都係新製，廚房布景都係新搭建，絕對唔係全部循環再用，但佢就冇解釋點解吳謹言冇份拍。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
