頭條獨家丨張敬軒Fans呻換補場門票安排混亂 數百人排隊等足幾個鐘
張敬軒（軒仔）一月開開吓紅館騷突然疫情升溫，演唱會都無奈要煞停，而日前主辦方宣佈2022年5月10日至2022年5月29日期間，會重啟演唱會，主辦方似乎都聽到Fans心聲，更特別加開8場場次，即一共會開16場，等多啲Fans可以入場見軒仔，認真識做。而加場門票，Fans就可以於5月4日搶飛！
至於觀賞補場演出的觀眾就要留意返，因受政府防疫條例限制，主辦方要重新編排所有座位及印製全新補場門票，睇補場的觀眾由今日起至下周一（9日）期間，或於觀賞補場場次當天，可以喺指定換領時間前往紅館更換補場門票，主辦方仲話每張門票可獲贈紀念品一份，都算係咁
而今日是安排換補場門票首日，有Fans趁紅日去紅館換補場門票。有Fans今日於「連登討論區」分享去拎補場門票時，見到有幾百人排隊，最後等咗幾個鐘先成功換到門票，大呻安排混亂，呼籲其他Fans要預鬆啲時間去換門票，更擔心如果開騷當日先去換門票，會耽誤入場。更有Fans留言表示排咗3至4個鐘，又話有10個櫃位都唔見加快到換門票流程，感到不滿，擔心開騷前先攞飛會更混亂。
而今日《頭條娛樂》到現場觀察，幾百人排到出場外，為避免人群聚集，排隊的Fans都獲安排先拎籌，再於指定時間回來換門票。不過即使有派籌，都不太見現場人士有減少的跡象。加上今日天陰陰又凍凍哋，有啲Fans都等到面黑黑。而據「連登討論區」的網民指，現場排隊要拎籌、填表、排隊、登記完再等拎新門票，批評安排好混亂。更有Fans以過往換門票經驗作比較，「排咗半個鐘拎籌，之後3個鐘後返嚟就唔使點等，Total搞左4個鐘，佢其實有10個Counter，唔明點解要分5個收飛5個派飛，一場分兩日換飛，即係一日都有5至6000人要換，我去換周杰倫飛指示係好清晰，分好咩行數去邊日咩時段換。」有Fans希望安排會有所改善。
更多第5波疫情資訊，請到以下專頁瀏覽按此
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
