2022年9月30日星期五

獨家丨蔡楓華自資6位數開Show最嬲被封「癲王」委屈20年：我冇精神病 #蔡楓華

獨家丨蔡楓華自資6位數開Show最嬲被封「癲王」委屈20年：我冇精神病

61歲蔡楓華(Ken)自資6位數於下月21及22日在荃灣大會堂舉行《情深永記演唱會》，最貴VIP位盛惠$780，尾場門票已售罄。入行43年的Ken坦言對被封做「四大癲王」耿耿於懷，強調從來冇精神病亦冇睇過精神科醫生：「唔做天王唔緊要，話係癲王就好離譜，會影響人哋事業，有冤無路訴。」委屈20年，他向《星島頭條》申冤，承認要靠食安眠藥入睡。採訪：方騫平攝影：譚志光場地：北角海逸酒店

蔡楓華接受記者訪問時做定功課，狀態大勇，話要提自己答得風趣啲喎。



Ken話𠵱家樓市回落想買鋪買豪宅，好有抱負。



他叮囑記者寫好啲，多提演唱會。



訪問當日行色匆匆，蔡楓華跟女助手快做訪問一小時後截的士轉場。



訪問當天蔡楓華變得好精靈，因為唔想有負面報道。



離別時仲同記者講拜拜。



街上冇乜途人發現阿Ken呀。



蔡楓華雖然發咗福，但步履輕盈。



蔡楓華20年前到特首辦，揚言有文件要特首簽名，但被警員阻止。

近年Ken心情變得開朗，他堅持喺疫情下需要發放正能量，開Show唔係為賺錢係為開心。他表示1983年成立歌富製作，以往除咗為自己，亦曾幫過張國榮、梅艷芳、陳慧嫻等開Show，憑經驗唔覺係冒險：「防疫經已成為港人常態，大家唔會再恐慌，唯一擔心中咗就開唔到show要『回水』，所以10月開始要閉關。」



對上一次蔡楓華開演唱會係2018年，之後受疫情影響延至下月開騷。



蔡楓華睇準疫情緩和時機，自資6位數開個唱。



10年前蔡楓華喺紅館舉行《情陷紅館演唱會》。



蔡楓華生日有忠粉獻吻。



呢個堅呀。

澄清冇畀電視台封殺

Ken又忽發奇想，最想邀請合作過的鍾楚紅、翁靜晶及莊靜宜做演唱會嘉賓，提到歌單時就鬧爆啲KOL：「其實乜人都可以做KOL，佢哋講娛樂秘聞呃到幾十萬個Like，啲料咪係讀報紙，點知秘密啫？佢哋仲好權威話『Ken得兩首歌！』講笑咩，我有百幾首歌《愛不是遊戲》、《絕對空虛》、《倩影》、《也許》，真係好鬼嬲。」他事先張揚個唱將演繹故友陳百強的歌，張國榮嘅歌就冇揀到，佢強調唔係放不低「一殺那光輝不是永恆」事件：「呢件事忘記咗好多年，唔好誤會我，我同哥哥一啲嘢都冇，只係要揀啲合適嘅歌唱。仲要澄清埋我當年冇畀電視台封殺，否則就拍唔到跟鄭裕玲、任達華合作嘅劇集《種計》。」



蔡楓華於2002年紅館演唱會時，播出與傳不和的亡友張國榮合照。



當年蔡楓華喺《勁歌金曲》失言，嚇親盧敏儀。



無線《勁歌金曲》30周年，第一代《勁歌》主持盧敏儀帶住蔡楓華做節目嘉賓，之後帶埋Ken再戰樂壇。



Ken否認當年畀電視台封殺，因為「一殺那光輝不是永恆」風波後仲跟鄭裕玲、任達華及歐陽佩珊合作拍劇集《種計》。



當日現身哥哥喪禮成為傳媒焦點。

好窮想買九肚山豪宅

記者多番追問蔡楓華在疫情下點維持生計，佢就咁答，「都有好多工作嘅，好似寫書出自傳會賺到錢，我仲會寫歌及返內地發展，同幾間公司傾緊合作嘢…但我冇錢好窮，冇10層8層樓喺手，𠵱家離開我目標好遠，但唔畀我有志願㗎？我睇中咗九肚山一個單位，以我年紀冇得上會，諗緊一炮過買起佢。」他又發揮大智慧，好權威地表示美國加息，「目前乜都唔好做留住啲Cash。」



蔡楓華不時返內地disco做騷賺錢。

問記者做唔做佢女友

過咗花甲之年的Ken形容自己係一個快活老實人：「如果講大起大跌我一定攞金牌，最紅時因失戀喺飛機上閃過自殺念頭，但人生匆匆幾十年，多錢少錢、紅同唔紅都係咁，但我唔難受，仍有好多人支持我呀，到咗呢個年紀你以為我仲係傻瓜？人哋屈我係『四大癲王』，我絕對唔係，呢十幾年用行動嚟洗脫咗，啲人亂講嘢侮辱人，人哋有大好前途真係會影響事業㗎！」他強調從冇精神病及睇精神專科：「因為工作太忙食過安眠藥爭取休息，呢行10個有10個都食啦，邊個做主角唔辛苦？但快樂。」另外，阿Ken自爆感情路上絕對空虛咗10幾年，當追問擇偶條件時？他口花花對著記者

說：「你有冇興趣做我女朋友呀？咁我同你發展吓…講笑啫，幾十歲你估我係湯鎮業咩？以前娶妻求靚女，𠵱家娶妻求淑女。」估唔到Ken跟得幾貼，連63歲湯鎮業再娶嫩妻都知道。